Mr.布志綸喊住迎7磅半B仔

樂隊Mr.的主音布志綸（Alan）在Facebook宣布做老竇，更開心Share囝囝的照片：「你出來的一刻我忍不住流淚了，媽媽為你付出的愛真的是無限的偉大，爸爸感受到了！要健健康康，做一個愛錫媽媽的好孩子啊！感恩！」他接受電話訪問時指囝囝於本月19日出世，重7磅半：「太太順產，痛咗18個鐘，原來生BB係咁痛，我都忍唔住爆喊！我親手幫囝囝剪臍帶，好似剪豬大腸咁。太太幫佢改咗個英文名叫Adam，同我一樣A字頭。」並指囝囝鼻高似媽咪，雙眼則似他：「最初都驚佢似我對眼，我又腫又矇，但都希望囝囝將來靚仔過我呢個老竇。」並透露太太打算餵人奶。