唐紫睿被指甲鎅面同郭思琳絕交
ViuTV真人騷《G-1格鬥會》中的女藝人由埋身打MMA肉搏戰變成打出真火，先有黎美言被圍插「犯眾憎」，另一「惹火」尤物34C唐紫睿昨日又爆料辣火頭，矛頭直指郭思琳賽前出言挑釁，比賽時又被對方以指甲劃花面，揚言「割蓆」冇Friend做！
真人騷《G-1格鬥會》8位女星由節目開播已傳不和，當中被圍插得最多的莫過於黎美言（Winkie），分別被唐紫睿（Hazel）、鄧洢玲及鄧穎芝鬧爆出手重，劉燕妮更揚言被Winkie打到有飛蚊症！
曾鬧Winkie「個樣好猙獰，繼而走火入魔」的Hazel，昨日又辣火頭，在社交網站發表千字文，揚言與第二圈賽事的對手郭思琳再見不是朋友！堪稱「惹火」尤物的她，先炮轟對方賽前出言挑釁，對着鏡頭說：「乜你覺得你贏到我咩？」令她擊起鬥志；再自爆在比賽中被對方以指甲劃花靚樣：「發生的種種不愉快事件，我倆都清楚，再見已不是朋友。」實行「割蓆」冇Friend做！
私下冇聯絡
不過，郭思琳昨日在電話中表示一頭霧水，不明白Hazel何出此言：「一直都有講有笑，冇正面衝突過。（私下有聯絡？）就算練嗰時都冇，都冇時間聯誼，兼顧唔到咁多嘢。」並否認講過挑釁說話。而Hazel則表示不想透露太多節目內容，叫觀眾收看便知道真相。她直言與郭思琳的第一場賽事是整個比賽中傷得最多：「佢啲指甲刮到我連眼都擘唔開，塊面啲傷痕最長嗰條成兩吋！」對於郭思琳否認出言挑釁，她說：「ViuTV有錄低o架，睇吓佢哋播唔播囉！」
文：影視組