Gin Lee兜踎五年脫貧搵筍盤

唱得之人Gin Lee過去發展未如理想，兩年前約滿舊公司曾窮到燶，經濟連同情緒陷入困境，幸靠意志戰勝負能量，她早前接受專訪自爆「窮歌手」日子：「嗰時真係幾谷底，唔食都要交租，我係去到冇錢交租地步，唔敢同屋企人講，怕佢哋擔心，自己死撐好無助。」當想到租金「凍過水」，她稱當時想到唯一方法是搬走：「諗番都好經典，心情好似過山車，我不斷打電話睇吓朋友有冇地方畀我暫住，等我再搵地方搬。」最後如何？Gin Lee尷尬笑道：「業主唔畀我走，佢話我要一個月通知，嗰時我先知可以用按金扣租，就係咁畀我捱多一個月。」

靠朋友幫拖

據知當時Gin Lee住在港島柴灣的舊樓，約三百呎的蝸居每月要近萬元租金，在「零」收入下是極大負擔，及後朋友幫她在同區找較平單位，並找到一些商演工作捱過一關：「維持幾個月，收入時有時冇咁，冇咪又搵地方搬。」

食車仔麵李幸倪節衣縮食兼搭電車。	平搭叮叮	李幸倪搵馮翰銘幫手揀筍盤。

走過最霉日子，Gin Lee去年成功泊得好碼頭簽約環球唱片，獲力捧做「一姐」，更返內地參加《中國好聲音》被天王周杰倫收歸為學員，令Gin Lee在內地知名度急升名利雙贏。脫離「窮sing」行列，據聞Gin Lee現住在灣仔唐樓，她曾向身邊好友表示趁樓市低迷想租到「筍盤」脫離「蝸居」。

平吔車仔麵

早前Gin Lee和好友馮翰銘（Alex）於中環區的地產舖流連，不停打量貼在門外的樓盤資料，Alex則手指指給意見，行過幾間地產舖後，Gin Lee似搵到心水盤即捉埋Alex入內，逗留十多分鐘才離開。

已升呢的Gin Lee仍不改「慳妹」本色，據曾和她工作的人員爆料，指她當年極少出街食飯，一日三餐不能超過八十蚊，雖然現在荷包有進脹，但慳儉習慣不改，只稍為「放寬」與朋友飯局。所以Gin Lee當日帶Alex去搭電車亦不為奇，醫肚就揀車仔麵，可能茶餐廳都嫌貴。

文：音樂組