阿倫輸波剝舒夫真高棚牙 豪派$1,500獎金

【記者黃兆崑、司徒子文上海直擊】明星足球隊昨日於上海與歐冠全明星隊對壘,對手包括烏克蘭前國腳「軍刀」舒夫真高及韋利等多名重量級球星,兩大球星事前向阿倫(譚詠麟)下戰書,揚言會各入五球擊退明星隊,惟最後未能實現,賽事以1:7作結,對賽果非常滿意的阿倫對剝了「軍刀」棚牙大表滿意,更豪派1,500元「贏波」獎金給隊員!

身為明星足球隊隊員的阿倫、黃日華、陳百祥(阿叻)等,昨日於上海出席「中歐全明星足球嘉年華」的「旭日伯樂計劃盃」,火併歐冠全明星隊包括舒夫真高、馬甸尼、韋利等一眾國際球星,武打巨星洪金寶、藝人羅家英亦有到場直擊!

黃日華打埋身戰

賽事最後以1:7作結,曾笑指「要贏世界級球星,除非個波係四方」的阿倫,賽後在更衣室宣布隊員獲發1,500元「贏波」獎金!原來昨日賽前吃早餐時,球星韋利及「軍刀」舒夫真高均向阿倫下戰書,揚言各入五球以大比數擊敗明星足球隊,惟最後未能如願,故阿倫對賽果大感滿足,「得戚」笑指已算「贏波」!舒夫真高做球員時係世界級前鋒,入波多到暈,有「軍刀」稱號,但今次畀阿倫剝咗棚牙。

兩隊對壘期間,歐冠隊全程絕不留手,上半場舒夫真高已梅開二度,再加上韋利跟岩布仙尼各入一球,半場已領先4:0,下半場後備入替的約基亦有進帳,舒夫真高再入兩球食出「大四喜」!明星隊則在末段發圍,由「男拔戴志偉」袁振昇射破門將托度「十指關」,成功得分!隊長黃日華期間與球星簡廸拿埋身扭波,阿倫和馬甸尼亦多次互相進擊。

見識世界級國腳

對於今仗感受,僅踢了30分鐘的阿倫說:「以往明星隊比賽都可輕鬆獲勝,今次對手係世界級名將,落場嘅球員都發覺舉步維艱,感覺對手無處不在,事實上對方踢得好輕鬆,好少跑動,只係意識同走位級數高,令球員知道真正世界級球技就喺咁!」明星隊將於今午回港,下場賽事暫定7月遠征瀋陽。