Alvin Goh潮流Gym子

唔運動會抑鬱

Alvin時常與名人紅星合作，如日本天后濱崎步、《標殺令》女星奧瑪花曼（Uma Thurman）、「大美人」李嘉欣等，為她們打造不同造型。出名要求高的Alvin，不但對自己的創作一絲不苟，對自己的身形亦同樣力求完美，更通過刻苦訓練，令自己由「瘦骨仙」變「肌肉男」！

我天生好瘦，好難變大隻，好辛苦。以前得50公斤，依家有60幾公斤，我覺得可以再好啲。我主要係練Crossfit（高強度循環訓練，如彈跳、舉重、引體上升等），之前簡直做到上癮，每星期做五、六次，每次一個鐘，喺好短時間內做好多嘢，好刺激。雖然我好細粒，不過我依家可以拎起145公斤嘅啞鈴。好多人都問我點解咁大決心塑身，好簡單，我覺得除衫嘅時候要覺得有自信，If you don't look good, you don't feel good（外形好，感覺自然好）。我之前試過為咗以最完美身形影相，除咗訓練，仲戒口戒得好清。我好鍾意食嘢，但嗰時每日只可以食一公斤雞肉，同要飲五公升蒸餾水，因為要排晒體內嘅鹽分。雖然辛苦，我覺得值得，人生喺唔同階段有唔同追求同要求，好有滿足感。

Alvin讚濱崎步做事有決心。

Alvin希望今年可提升自己。

我成日要周圍飛，令訓練難咗好多，因為當我好忙、有壓力時，都唔會變大隻。所以我返到香港，有時間就操，同埋去外地公幹時，唯一要求係酒店一定要有健身房。就算嗰日好忙，都會抽10至20分鐘做Gym，將健身變成習慣。同埋我唔運動嘅話會抑鬱，真係好變態，成日一去到酒店就第一時間做運動，我覺得咁可以幫我減壓。

我成日要周圍飛，令訓練難咗好多，因為當我好忙、有壓力時，都唔會變大隻。所以我返到香港，有時間就操，同埋去外地公幹時，唯一要求係酒店一定要有健身房。就算嗰日好忙，都會抽10至20分鐘做Gym，將健身變成習慣。同埋我唔運動嘅話會抑鬱，真係好變態，成日一去到酒店就第一時間做運動，我覺得咁可以幫我減壓。

型仔拒認男神

Alvin樣貌俊俏，加上練得一身完美肌肉及事業有成，完全符合「男神」的所有條件。不止女生傾慕他，就連男生也被他迷倒，絕對是男女通殺的「男神」，但對於這稱呼，Alvin卻笑言不敢當。

「男神」呢個稱號太大，我擔當唔起。我從來都覺得自己做好自己嘅嘢，想畀到驚喜嘅作品大家睇。做呢行都要keep fit同靚仔，不過男神就太完美，我都有唔完美嘅地方。我今年生日願望係無論內在定外在，都提升自己。同埋可能係我平時面對記者，總會表現自己最好一面，但我私下唔係咁，係好普通、好正常、好腳踏實地嘅人。

始終我唔係做明星，我有冇拍拖、我嘅性取向等等，我都唔太想講，我覺得自己嘅私生活唔需要回答，只希望大家會留意多啲我嘅作品。之前有好多唔同報道，一時話我係濱崎步新男友，一時又話我睇中佢老公，都完全唔合情理。不過我都唔會放喺心，只會當笑話咁睇。

至於受唔受同志歡迎，我真係唔清楚，之前冇聽人講過，不過都令我覺得好大壓力。其實都算係好事，因為好多同志嘅要求都好高，好追求完美，所以都覺得好榮幸。

向濱崎步學習

熱愛運動的Alvin，當然曾與好友濱崎步齊齊做運動，他更從過程中，發現濱崎步很勤力及有決心。Alvin說：「佢係我見過最勤力嘅藝人，佢每件事都親力親為，連電郵都自己覆。佢一有演唱會就會做好多運動，喺好短時間內就會好fit。有次同佢一齊做瑜伽，有一個好難做嘅動作，要保持住個姿勢五分鐘，我做咗三分鐘就頂唔順，就快死咁，佢就堅持到五分鐘！睇到佢就知，要成功，一定要好有決心做事。」

口述：Alvin Goh　筆錄：龔凱欣

攝影：吳文聰　

服裝：Louis Vuitton／Balmain　

腕錶：BVLGARI

場地：The Upper House