父親身家蒸發14億 翠如笑住開工
藝人黃翠如父親黃永華主理的聯旺近日股價升勢創下神話，但昨日大玩過車山，搞到連日升勢斷纜，一度喪插逾56%，低見5元，雖然之後亦有上升，但全日暴跌近26%，收報8.6元，令黃爸爸身家一日之間蒸發14億。昨日下午四時半，本報記者到聯旺於火炭的登記地址視察，只見辦公室內烏燈黑火，撳鐘亦沒有人應門，據知該辦公室實用面積亦甚細。
龔嘉欣撐心情輕鬆
翠如男友蕭正楠昨晚9時40分到達將軍澳電視廣播城開工，未有回應記者問題。而翠如亦在兩分鐘後現身。當記者欲問股價下跌回應時，翠如即笑笑口謂：「我一句都唔會答喇。」便隨時步入化妝間，之後亦在經理人安排下，讓記者拍照。而翠如好友洪永城得知消息後表示股價有升有跌，所以不認為對方困擾好大：「同埋呢排佢開工拍劇好忙，所以都冇特別同佢傾過股票嘅嘢。」他又指股民應要更加謹慎：「開頭升得咁快真係要小心啲。」近日與翠如一同拍攝無綫新劇《幕後玩家》的龔嘉欣，亦指對方安守演員本分：「佢都冇點留意到個股價，平時都冇同佢傾開。」又謂對方開工心情依然輕鬆：「但始終明白佢想自己屋企人嘅嘢可以低調啲。」
