超模陳慧琳行騷 32保安擺陣
天后陳慧琳（Kelly）昨日在上海為時裝騷擔任壓軸模特兒，身形、台風毫不遜於同台其他專業模特兒，索媽升呢超模！而據知大會在申請批文時，有關部門知道Kelly會現身後，指定現場必須要有32名保安駐守，屬一級巨星規格！
【車綺敏上海直擊】陳慧琳昨日在上海出席德國時裝品牌Marc Cain活動，下午她以一身橙紅色套裝落舖睇衫，由品牌高層、品牌創意總監Karin Veit和身兼藝術總監及香港時裝設計師的鄧達智全程傍實，盡顯天后身份。晚上Kelly換上另一套白底橙紅色印花流蘇短裙，壓軸為時裝騷擔任模特兒，她甫出場即變身超模，不時以手叉腰，引來全場歡呼兼拍爛手掌，更有不少人站起來舉機影相！
有意撈埋設計
騷後Kelly透露心情輕鬆，揚言行騷毫無難度。她稱7年前懷孕時已跟品牌合作，十分有淵源，又自爆有意做時裝設計：「覺得會好好玩，但如果真係開始做，又要花好多時間，因為由概念到布料、剪裁方面咩都要諗，最想做秋冬服飾，啲衫可以多啲層次。」又笑言曾為Barbie公仔織衫，但沒有為囝囝織冷衫：「到我織完件衫佢都大個咗啦！（咁老公呢？）織過一條頸巾畀佢，不過佢可能掉咗啦。」對於有指兒子蝦餃仔劉昇貌似宋仲基，Kelly表示不介意囝囝做童星，更認為可以一齊玩更好，但老公則希望囝囝過平凡低調的生活。另外，正忙於籌備巡迴演唱會的她透露或會於7月的美國站帶蝦餃仔上台，更揚言屆時會讓他穿上迷你軍服出場。
時裝騷後，鄧達智大讚Kelly有氣質，而且纖腰應該不到24吋。談到現場有數十名保安，鄧達智說：「大會申請批文時，有關部門評估Kelly有好多粉絲，所以規定要有32個保安，好嚴格，係一級巨星嘅保安規格。」