洪永城探秘亞馬遜影婚照
洪永城（Tony）前晚出席戶外品牌Columbia活動時，坦言想到巴西採訪奧運，但怕惹到當地的寨卡病毒而搞到生唔到B！問會否到玻利維亞仙境「天空之鏡」影婚紗相時，他就故作神秘話心中有更特別的地點：「可能喺亞馬遜裏面，細細個已經諗定！」
藝人洪永城前晚以「旅遊王子」身份，聯同旅遊達人項明生（James）在太古出席「Columbia探索神秘國度」活動，Tony大談旅遊趣事，亦試穿新款防水風褸。
驚染寨卡礙生B
受訪時，已走訪50多國的Tony坦言想年中到巴西里約熱內盧採訪奧運，問女友唐詩詠會否一同前往？他直言詩詠對運動興趣不大：「佢去埋我會分心做唔到嘢，佢嗰段時間都好似有劇身。」
鑑於巴西的治安問題，Tony表示會留在大城市，所以相對安心，但怕被蚊叮感染肆虐南美的寨卡病毒而影響生育，他說：「好似暫時都未有疫苗。（存定精子？）應該唔會，希望遲有疫苗。」問是否打算與詩詠生好多個B？他謂：「始終人係會計劃呢件事，唔係都唔會擔心。」
項明生訪日韓台
談到James在會上分享玻利維亞的仙境「天空之鏡」美景，問Tony會否考慮到當地影婚紗相，他指自己心目中有個更特別的地點：「冇乜人知，尋幽探秘咁，可能亞馬遜裏面，細細個已經諗定！」
另外，James在會上透露日前到韓國和台灣拍攝無旅遊節目《追櫻日韓台》，稍後會到日本拍攝餘下部分。
文：影視組