阿Sa「留後鬥前」拒露靚股
【衛紫敏廣州直擊】組合Twins將於下月巡唱到廣州，昨日蔡卓妍（阿Sa）和鍾欣潼（阿嬌）在廣州出席記者會，擁「iPad胸」的阿Sa揚言寧願「留後鬥前」，拒絕晒「優質股」！
組合Twins的《#TWINS#LOL#世界巡迴演唱會#》將於下月21日在廣州體育館舉行，昨日兩人在廣州出席記者會，大批歌迷專程到場打氣，大會公布繼廣州站後，還會到深圳、上海、北京、佛山、成都、南寧及澳門等地開騷。阿Sa和阿嬌透露將由香港的四面台改為三面台，故部分造型和舞蹈會重新編排，問到服裝會否着重前面要性感夠睇頭？經常被嘲是「iPad胸」的阿Sa抵死笑說：「唔通後面唔着咩！好蠱惑喎，咪露咗個『優質股』出嚟！」
否認戀富二代
提到前晚在《Good Take！》首映禮上，被問到「新歡」是印尼餐廳的富二代蔣翹帆，阿Sa即否認戀情，並強調對方是認識多年的朋友：「完全唔係，有戀情會講。」提到當年與鄭中基離婚後，兩人才開記者會交代，若有戀情是否真的會公開？阿Sa即認衰說：「結婚時囉！（結婚後先公開？）點呀，我改邪歸正好耐啦！五年前改咗啦！仲『抽秤』我嘅。」
阿嬌「跪求」相睇
問到會否請「蔣生」來睇騷？阿Sa說：「吓……啱啱要諗一諗邊個係蔣生！我歡迎任何朋友嚟睇嘅，但廣州場已經賣晒喇！（其他場囉，仲可以叫佢包伙食？）救命呀，朋友咋！」談到阿嬌同樣未有着落，需要人介紹男友，阿嬌說：「係呀，我都要。」阿Sa即「介紹」她上內地節目《非誠勿擾》，但隨即否認會接拍求愛節目。