容祖兒甜絲絲Hard Sell男友

天后容祖兒與音樂創作人馮翰銘（Alex Fung）昨日為將於6月舉行的音樂會舉行記者會，祖兒透露屆時會有嘉賓，但不會是好友李克勤：「見到嘔，一星期得一日見唔到佢。」問到可會邀男友劉浩龍（師兄）做嘉賓？她說：「未有呢個諗法，佢冇自薦，我又唔抗拒，但未有心理準備。」隨即加大力度撐最近推出新碟的師兄：「佢啲新歌好好聽，可能到時翻唱佢啲歌。」順勢幫男友宣傳新碟，認真唔話得！問到最喜歡師兄哪首歌？祖兒甜笑說：「首首都咁好聽！」期間祖兒自覺忽略了身旁的Alex Fung，即尷尬道歉，場面搞笑。