網友笑鄭嘉穎500年冇洗頭似元華
鄭嘉穎在劇集《殭》的造型惹起網民「諷」議，竟被指似足「殭屍」始祖元華，嘉穎更是「油立立」版。雖然如此，嘉穎在劇中依然魅力十足，不僅令謝安琪「心心眼」，現實中的女友陳凱琳更是對他一見傾心。至於「人氣王」吳業坤繼前晚露點露腩後，今晚會「重施故技」，他更坦言全裸都冇所謂！
藝人鄭嘉穎、謝安琪、陳山聰主演的無綫新劇《殭》題材新鮮，劇情緊張得來亦有過癮搞笑位，收視亦上升，此劇已播映三集，網上有不少回響，之前大家將焦點放在女神謝安琪（Kay）身上，不過提到「不死人」鄭嘉穎，大家都有新話題！
吳業坤隨時全裸
劇中嘉穎飾演於世上活了500年的不死人，對住女神Kay都cool到爆，對住殭屍陳山聰則是非常狠，打到上天落地，其實嘉穎這個chok爆造型和演繹，理應好「煞食」，但網民就發現留了鬍鬚、梳all back長髮兼髮腳鬈曲的他，十足「殭屍」始祖元華般，網民仲抵死到將二人相片合併，如孖生兄弟般，不同之處是嘉穎頭髮「油立立」，網民還問「係咪掛住打殭屍，五百年冇洗過頭」！網民又指劇中嘉穎經常有招牌喪叫，有網民更謂：「終於明點解之前陳凱琳拍《張保仔》係咁叫，可能係佢教。」虧佢哋諗得到！其實嘉穎在劇中確實有型，令Kay和陳凱琳兩位女神都迷戀他，當中Kay更不停施嗲功向他表白，可見嘉穎魅力十足！
另外，客串演出的吳業坤在前晚一集中，於嘉穎開設的深宵食堂，點了一碗「一絲不掛麵」，吳業坤更剝衫露兩點，期間還拋了一個媚眼，但就出賣了他的「豬腩肉」，可謂於緊張情節中搞笑一下。首次獻出「半裸」的他事後受訪時大方謂：「我有睇，如果幫到劇情推進嘅話，我真係冇所謂。（咁全裸呢？）睇吓尺度，我冇問題，OK嘅！」今晚播映一集中，吳業坤再「露點露腩」，更與嘉穎玩扯底褲遊戲，嘉穎和吳業坤更各自掹出自己的底褲！
陳山聰攰到瞓地
而飾演殭屍的陳山聰與嘉穎由500年前打到現代，前晚更有吸血場面，山聰坦言大家看到的分幾鐘打戲，其實他們打了幾晚通宵，之前於荷蘭拍完打戲，他們更於博物館地下瞓着了。說到場口血腥，山聰謂：「嗰個時段有家長指引，拍殭屍片梗係有呢啲場面，血唔血腥睇你點睇，依家我哋踏出第一步，希望觀眾可以接受。」
文：影視組