股你唔到！「52億千金」翠如一毫子都冇賺過

由藝員黃翠如父親黃永華任大股東兼行政總裁的建築股聯旺（08217），前日「敲鐘」掛牌，翠如BB與男友蕭正楠到場支持，首日由配售價0.26元炒高14倍，「慳妹」翠如亦在一日間成為「富二代」。而獲「翠如股」美譽的聯旺，昨日走勢依然強勁，一度升至14元，較配售價0.26元高52.84倍，全日則收11.28元，漲1.82倍，較配售價高42.38倍。以公司市值暴升至140多億港元，黃爸爸持有的4.68億股，持股比例37.5%，以昨日收市價11.28元計，其持股市值超過52.79億元，飆升的速度快如閃電！

收幾百個msg問股

一日間由「19億千金」一躍成為「52億千金」，翠如BB轉眼成為娛樂圈神話，但面對「身價」一下子暴升，身為演員的她亦未能接受戲劇性的轉變，她在社交網站透露曾向黃爸爸求救：「收到幾百個msg問關於股票的事，完全把我嚇壞，我馬上找我老爸，爸爸說，金錢數字從來都是雲煙，我們不了解股票炒賣，也不會炒賣。爸爸上市只是為了籌集資金把地盤工作做得好，因為是地盤養大了幾個女兒。」

面對「身份」生活劇變，翠如BB就選擇「以不變應萬變」，又稱會繼續努力演戲，生活繼續「貼地」：「所以關於股票，爸爸沒有興趣，女兒也沒有興趣。爸爸繼續努力建路，女兒繼續努力做戲，媽媽繼續努力找平菜買，我們仍然維持我們快樂平實的家庭生活就好了。假如你問我這個瘋狂炒賣，我有沒有一毫子進帳，我答你，一毫子也沒有。但要請食飯，還是可以的。」翠如回應一出，贏得不少網民「正評」，大讚她是位體貼父親的女兒。

倒米唔撐炒賣

翠如昨晚返回將軍澳電視城，為劇集《幕後玩家》開工，繼續其一貫樸素打扮，面對追問，她說：「股票嘢我真係唔識，我都係靠睇財經分析去了解件事，我同屋企人都唔識股票，唔會炒賣，亦都唔支持炒賣。」談到昨日股價繼續勁升，她說：「我冇睇，連股票冧巴幾號都唔知。（市價勁升到140多億？）股票向來都係數字遊戲，識玩股嘅都知。（介意被稱為「52億千金」？）今日我有300蚊喺身，可以叫我『300蚊二家姐』。」

談到在社交網站指有朋友問及股票的事，翠如笑言對股票毫不認識，因此有少少困擾。談到馬國明等好友嗌請食飯，她指同劇拍檔黃宗澤都有提及：「佢叫我哋收工去餐廳食消夜，但佢都有買番嘢請大家食。」問到黃爸爸有否指示她減少工作陪家人？翠如強調生活不會因此改變：「對我嚟講冇改變，都係對我冇關係嘅，都係專注工作，自己淨係關心『0628』，即係開工同收工時間。」

文：影視組