陳寶珠唔使囝囝做狀元
粵劇名伶陳寶珠及梅雪詩（阿嗲）昨日以慈善大使身份在尖沙咀出席慈善粵劇記者會，就近日青少年輕生風氣盛行，呼籲珍惜生命及防止自殺，寄語父母與子女之間溝通需雙向，作為父母亦應多留意子女狀況：「有朋友個女讀嗰間學校都有呢種風氣，佢發現個女都有少少咁嘅傾向就即刻同個女傾，話畀佢知學業唔緊要，只要盡咗力就得，唔需要一定做到最高嗰個，父母會支持你。」
輕生成風 父母有責
問到囝囝楊天經可曾有輕生念頭？寶珠坦言當時自殺風氣不盛：「我唔係要佢做狀元，合格就得喇！逼佢反而有反效果，同埋依家啲小朋友太幸福喇！幾歲就有平板電腦，唔開住嚟睇就唔食飯，父母都應該要負責。」
而阿嗲對輕生風氣大感痛心，反問為何輕生的勇氣不用於繼續人生的道路，希望大家凡事珍惜，不要輕言放棄父母眠乾睡濕的栽培：「父母一定係希望你繼續去闖！」是次記者會亦為多位粵劇小演員的慈善粵劇作宣傳，還邀得幾位小演員現場清唱，阿嗲大讚勇氣可嘉：「我都冇勇氣好似佢哋頭先冇音樂咁清唱，見到佢哋表演好開心。」寶珠亦應聲和贊同。