「如楠」公廁外濕身求婚張繼聰激凸見證

黃翠如及蕭正楠前日在九龍城為新劇拍攝一場女方主動求婚的戲份，不過場面另類搞笑，竟選址在公廁及垃圾房外，而為配合潑水節，各人被射到由頭濕落腳，同場的張繼聰下身更離奇激凸，「抬頭」送上祝福！拍攝後眾人貪玩在街頭進行水戰，阿聰更成為被夾擊對象。

情侶檔藝人黃翠如與蕭正楠（Edwin）前日與張繼聰、龔嘉欣在九龍城拍攝新劇《幕後玩家》，為配合該區舉行潑水節，劇情加入潑水場面，各人被射到全身濕透，翠如與Edwin更在公廁及垃圾房外上演求婚戲，由翠如做主動發表愛的宣言，Edwin答應後即抱起她，翠如大叫：「我結婚喇！」卻突然嗌痛指被頂親，原來Edwin早已預備鑽戒，飾演Edwin好友的張繼聰現身興奮叫好，並向二人潑水，但身穿西褲的他下身離奇拱起，激凸見證婚事！

街頭水戰市民鳥獸散

拍攝後，各人繼續水戰圍攻阿聰，龔嘉欣玩到披頭散髮，各人又狼死得先後拎起大水桶互淋，嚇得笑住睇熱鬧的市民鳥獸散。Edwin受訪時笑言在男廁外被女友求婚，感覺新穎：「拍呢齣劇好開心！同黃宗澤成十年冇合作，今次又有張繼聰，翠如個角色有好大發揮，我好期待！」問到現實求婚會否也這樣另類？他笑說：「未諗！都希望咁有趣！（叫翠如讀愛的宣言？）應該男人做嘅嘢就男人做番好啲！」講到阿聰激凸，Edwin搞笑地說：「佢見親我都係咁嘅反應！」