苗僑偉飲醉發狂咀麻甩佬
藝人苗僑偉與林盛斌（Bob）為無綫節目擔任嘉賓，二人同愛杯中物，不過就適可而止，苗僑偉笑指自己酒量一般，試過飲醉酒斷片攬男友人錫。而曾在錢國偉婚宴中醉酒的Bob直認事件令他有所反省，怕飲醉再次影響人。
藝人林盛斌（Bob）及苗僑偉等昨日錄影由許紹雄、梁烈唯及金剛主持的無綫節目《男人食堂》，金剛取出手機與一眾嘉賓自拍，由於當集節目以酒做主題，苗僑偉便帶了一支價值五位數字的美酒供大家品嘗。
酒量好過曾志偉
苗僑偉被問酒量如何？他稱只是一般，但笑謂一定比曾志偉好，又指志偉酒品好，即使飲醉亦只會睡覺，不會搞事。雖然苗僑偉懂得節制，但也試過飲醉酒：「唯一一次飲到斷片係三嫂（太太戚美珍）大壽，攬住啲男性朋友錫，酒醉都有三分醒，如果錫女仔就變咗博懵。」
他表示戚美珍知道他飲酒是因為開心，故未有怨言，他又笑說：「依家返內地做嘢，十六個人食飯會有十五個人敬你，而且係烈酒，飲茅台，所以要識得控制。」談到工作，苗僑偉表示將於內地及香港宣傳兩部電影，月尾又要到橫店拍劇，太太會與他同行。他又謂無綫暫未有找他拍劇：「有啱就會搵我。（有新電視台？）會返去睇吓，有啱嘅節目都可以傾吓。」
Bob怕錫錯陳婉衡
Bob被指節目講飲酒是為他而設，他笑笑口否認：「唔係，同唯唯（梁烈唯）佢哋會私下食飯，淨係講飯局趣事都好多嘢講，淨係請我都講集幾啦！」問到會否擔心在節目飲醉再咀唯唯？他笑言：「應該唔會，因為陳婉衡喺度！」曾在錢國偉婚宴飲醉與陳小春發生衝突的他，直認事件令他反省，指近大半年都少飲酒，擔心影響他人。
文：影視組