林保怡Chur爆趕劇殘晒！
藝人林保怡、陳奕迅、劉心悠及周家怡等昨日出席ViuTV啟播禮，正為新劇《瑪嘉烈與大衛》開工的保怡透露，劇集將於下周一出街，惟至今只拍至第6集，擔心拍攝進度未能趕上，預料稍後將每日開工18小時，他無奈地說：「太長時間，我可能會有嘢跌落嚟，好似下巴同眼袋咁，套劇就要改名叫《瑪嘉烈與『墮』衛》啦！」
劉心悠怒擲手機
心悠則透露早前與郭偉亮（Eric Kwok）為節目遠赴古巴拍攝兩星期，難忘Eric在行程尾聲一度想放棄她離開古巴，她一怒之下用手機擲向對方發洩，Eric說：「實在太辛苦，又冇啖好食，又病又唔夠瞓，心諗仲去個島做乜？咪想出發去機場走囉！後來當然係死死地氣啦！（之後仲拍唔拍？）去完古巴就乜都可以拍，冇嘢難倒我！」
文：影視組
