楊怡露腰肚扁扁證冇餡

楊怡穿上露腰裝，還舉起手以行動證明未有懷孕。

藝人楊怡、敖嘉年、李綺雯和林子善等昨日出席劇集《末代御醫》宣傳，盛傳懷孕的阿怡穿上露腰裝，肚皮依舊扁平，加上身形瘦了少許，實行以行動證明未有身孕，對此阿怡笑謂：「大家諗多咗，都係嗰樣嘢，唔會刻意話畀大家知，時間證明一切。（不設防？）隨緣，自己工作都想做。（意外呢？）希望唔好有意外，touchwood，順其自然啦！」

歡迎夫妻檔合作

談到與無綫合約已於本月一日屆滿，阿怡坦言還未續約，是次活動暫成為她在無綫的最後活動，問到新動向，阿怡謂：「好多嘢傾緊，呢行好細，無綫係我娘家，有啱嘅嘢都會做。（老公羅仲謙有冇畀意見？）工作方面大家係獨立，佢會畀意見。（有內地公司搵？）之前都有傾，但要睇適合時間。」

笑晒口的楊怡與敖嘉年、林子善（右）非常好傾。

楊怡向現場人士派發紀念品。

問到現時是否適合時間？阿怡笑指現時很忙，因要籌備年尾擺酒事宜，由於今年是盲年，故正為挑選日子煩惱，更揚言希望獲贊助。而屬自由身的她被問會否加盟阿謙的公司星皓，阿怡坦言沒有這個想法，但不抗拒夫妻檔出席活動或合作。

採訪：影視組