祖兒心痛Fans受騙克勤笑笨賊
容祖兒與李克勤日前在中山舉行巡唱，有人趁機以3D打印技術印製大量假飛兜售，令數百名粉絲受騙，公安當場以大麻繩將不法之徒繩之於法！祖兒對粉絲受騙感心痛，叮囑歌迷要經合法途徑購票，克勤則笑騙徒太笨。
上周末（2日），容祖兒與李克勤北上中山舉行《容祖兒X李克勤世界巡迴演唱會》，一萬二千個座位全部爆滿，由於一票難求，惹來不法之徒乘機搵錢！當晚有人在現場兜售大量3D打印的假票，令數百座位出現觀眾重複持票，結果開場後台上唱歌，台下則上演公安捉賊！有觀眾目擊公安以大麻繩將三個涉嫌印製假門票的人「繩」之於法，逾百名誤購假飛的粉絲則被帶返警局落口供協助調查。
爆黃牛黨行「兇」
完騷後，祖兒及克勤得知有歌迷受騙感無奈，希望接下來的內地各站巡演，歌迷能在有信譽的合法機構購票，不要隨便相信人，克勤笑說：「唔知點解呢個年代仲有呢一類嘅笨賊出現！可能佢一方面賺到盆滿缽滿，另一方面又真係好欣賞我同祖兒嘅演唱會，所以佢賣完啲假飛，又走埋入嚟睇騷！如果佢唔係睇埋個騷，可能公安捉唔到佢，呢啲咪天網恢恢，希望唔好再有呢啲情況出現。」
至於祖兒則戥受騙的粉絲不值：「知道有啲粉絲好慘，買咗假飛，真係要同佢哋講聲唔好意思。嗰啲賣假飛嘅衰人，希望拉晒佢哋！」還表示知道曾有粉絲買黃牛飛：「唔單只演唱會有賣假飛，之前有女粉絲買咗《我是歌手4》嘅黃牛門票，仲要畀嗰啲黃牛黨嘅人『兇』同推撞，真係好危險！如果為咗睇騷受到傷害，咁我好難同佢哋父母交代。」
險整傷埋右腳
演唱會上，左腳傷患未愈的祖兒因看不清楚樓梯級，幾乎差錯腳而險弄傷右腳，但與早前因貪玩踢波而整傷左腳的克勤一上台即齊齊忘記痛楚，依然大跳大唱互相扶持，祖兒更笑克勤唱到成身汗，克勤即笑說：「好明顯喇！我冇Deep V嘛！」克勤繼而嘲戴面紗唱歌的祖兒：「你做乜將絲襪笠喺個頭度！」祖兒即配合笑說：「打劫呀！」搞到全場大笑。
文：音樂組