軒仔優良血統搵代母生B
年屆35兼是獨子的張敬軒前晚出席頒獎禮，自爆早前獲高人直指會有下一代，故引來多位女友人自告奮勇要做「張太」，單身多時的他自誇是優良血統，但現時未有做爸爸計劃，只有意領養小朋友，不過亦考慮搵代母生BB。
張敬軒、泳兒、許志安、溫拿、吳若希、許廷鏗、草蜢及林志美等歌手前晚出席「IFPI香港唱片銷量大獎2015」頒獎禮，英皇狂掃十五個大獎，溫拿獲頒「IFPI香港流行音樂文化貢獻樂隊大獎」，西裝骨骨的軒仔勇奪「十大銷量廣東唱片」、「十大銷量本地歌手」及「全年最高銷量本地男歌手」三大獎。軒仔受訪時透露早前獲高人贈了幾句：「話我會有小朋友，鼻頭大會有四胎添，身邊好多朋友即自告奮勇，我呢啲係優良品種。」
溫拿得獎 阿倫唔掃興
喜歡小朋友的軒仔表示現階段未有生仔打算，問到會否領養？他說：「有，不過單身領養好麻煩。（考慮搵代母？）如果係會搵黑人，因為小朋友可以唱R & B，如果畀我揀都係領養，令不幸小朋友有個幸福未來。」一身Rock友打扮示人的溫拿說：「同後生仔一齊嘛，今日係超級大獎。」曾表示不再攞獎的譚詠麟（阿倫）說：「競爭性唔攞，今次係溫拿唔好掃興。」由於陳友透露忙於寫音樂電影劇本，有意搵吳業坤演其子，剛巧對方經過，陳友即與吳業坤影「父子相」。
泳兒騷美腿性感誘人
穿上四吋高踭鞋的林志美日前打網球扭親右腳，她說：「唔小心踩波車，成個人跌咗落地，好彩冇戥親，已經好番八成，好珍惜健步如飛。」她全程要由助手扶住行。而許志安透露今時今日仍能推出實體唱片感開心，他說：「實體碟係一個回憶。」泳兒演唱時，現場騷美腿展現性感。
文：音樂組