林敏驄於1990年與曾志偉合作做亞視節目《開心主流派》，當時甚受歡迎，有見亞視將熄機，阿驄為本報獨家炮製一條片，並以《開》的環節「開心字典」作開端：「開心字典今次為大家介紹啲開心，但係今次又唔係好開心嘅字，就係個『執』字，執本來意思係執到寶，今日個意思係結業，即係執笠！默默咁結業，即係『墨汁』，揸住成喼銀紙都要結業嘅，就係『喼汁』，正所謂結果都要結業嘅，就係『果汁』。」
之後阿驄正經說當年：「嗰時好犀利，好多舖頭話我知，差唔多到時間就拉閘返屋企睇電視，當時監製係志偉同陳家瑛，仲有余詠珊，如果一齊搞番個節目邊有得輸。我覺得最緊要係老闆同員工之間，一條心槍口向外，唔好各懷鬼胎，個牌攞番嚟唔易，梗係要搞好，希望新嘅電視台會有新氣象。」