蕊蕊搏命跣落樓梯受傷
藝人金剛近年大搞生果及大閘蟹等生意，身為女友兼歌手蕊蕊一樣勤力吸金，最近憑其34F過人「胸」器以性感姿態上陣拍攝內地的網絡電影。在戲中飾演身手不凡兼索爆酒吧老闆娘的蕊蕊，親熱戲點到即止，蕊蕊說：「都係同男主角攬咗一下。其實我份人好保守，咁樣夠啦！」雖然蕊蕊笑言性格保守，但每當以低胸上陣時，竟大頭蝦未有做足防走光措施包括黐膠紙等，她笑說：「完全冇呀，諗落冇走光真係好好彩！」
金剛教普通話
由於要應付不少動作戲，處女下海拍打戲的蕊蕊不慎受傷，靚股當災！她說：「其實今次係第一次拍打戲，好在之前都有學過打拳同有跳舞基礎，所以都好快適應，連啲武指都話我有天分。但有一場戲我唔小心跣咗落樓梯，成個patpat瘀晒，不過當時我就忍痛拍埋佢，導演都話good take，因為當時我真係真情流露。」
拍戲傷股，蕊蕊說金剛當然有安慰，同時又感激對方教她普通話，她說：「成部戲都要講普通話，所以我一唔使埋位就會狂背稿之餘，都有向金剛請教讀音。」
