陸永6號駁火撞冧把結怨
組合農夫成員陸永前晚在棟篤唱中表示很多人將其與藝人6號（陸浩明）混淆，笑言很憎6號，而6號聞言表示也常被誤叫陸永，並鬼馬反擊：「我都好憎佢！不如以後叫陸永做DoDo姐，我就叫肥媽，一定無搞錯！」
張達明與農夫前晚假伊館舉行首場棟篤唱，不少圈中藝人到場支持，包括鄭丹瑞、謝天華、谷德昭、陳柏宇、薛家燕等，而鄭中基則擔壓軸嘉賓獻唱，場面熱鬧。其中一節，農夫成員陸永表示出道10年，雖然去年多出現於電視節目中，尤其獲最佳綜藝節目獎的《Do姐去Shopping》，得到很多觀眾認識，但仍有人誤叫他為6號（陸浩明）：「我唔係憎佢，但我成日畀人叫錯做6號，搞到有啲憎佢！」又笑言：「係呀，我同肥媽有嘢！」他亦有分享做人爸爸的辛酸史，說：「啲人話返去見到小朋友好似天堂，睇吓喺天堂做咩囉，我覺得喺天堂好似受難，咩都做齊，佢都仲瘋狂喊！」獲現場已為人父的觀眾拍掌示意有共鳴。
變MC達明氣勢出場
三位主角以夾Band造型出場，負責打鼓的達明可見精神狀態甚佳，打鼓都打得起勁！達明多次出場都氣勢十足，除了踩滑板車外，還有全金hip hop造型上陣，化身MC DaMin。曾經勇敢抗癌的他分享患病感受，現場更播放達明入行以來的照片，坦言好希望能完全康復變回「正常人」。
失婚林雅詩任公關
同場的藝人林雅詩早前因老公「偷食」而大喊離婚，前晚她擔任統籌公關一職，坦言望在多方面學習，唔再靠男人，並表示離婚手續已交由律師處理。她透露將簽新公司，以及接拍功夫片：「第一次做打女，有整親腳，要keep住練。」
而藝人陸浩明（6號）昨日出席活動時，談到陸永笑指常被誤叫「6號」而憎他，6號聞言鬼馬反擊：「我都好憎佢，喺服裝間都有人叫我做陸永，有次肥媽叫咗佢做6號，佢見係肥媽所以算。不如以後叫陸永做DoDo姐，我就叫肥媽，一定無搞錯！」
文：專案組