楊怡巨鑽放閃謙謙冧叫「我太太」

無綫花旦楊怡與羅仲謙日前被揭於3月22日，在英國秘密註冊結婚，花費十多萬港元包下著名古堡影婚照。一對新人昨日返抵香港面見傳媒，於下午三時半二人步出機場禁區，略見疲態的謙謙戴上黑框眼鏡，未見手上有婚戒，反而戴墨鏡的楊怡精神奕奕揮手示好，更晒出左手無名指的巨型鑽戒，據知是訂婚戒指。

一對新人接受訪問期間，謙謙多次稱呼楊怡為「我太太」，認真恩愛！談到今次英國之行，謙謙表示：「今次想大家家人見面，畀我太太一個甜蜜回憶。點解揀英國呢，我鍾意古典氣氛重，同埋我希望太太好似公主咁出嫁。」

強調非奉子成婚

對於遭家姐楊卓娜踢爆婚事，楊怡表示：「唔好講踢爆，都打算畀大家知，返嚟諗住會講，估唔到大家早咗知道，呢個比我哋預料嘅早啲。（因懷孕而趕婚？）唔係掛，咁爆？我今日條腰得22吋！」問謙謙是否想盡快生B？他笑說：「太太都唔急，我急咩呢？」不過阿怡被問到是否習慣被稱呼為羅太時，她笑說：「唔慣呀，大家唔好咁嗌我！」

羅仲謙親吻「我太太」楊怡額頭晒恩愛。	《東網巨星》昨全程直擊羅仲謙傍實楊怡高調返港。	楊怡晒閃爆巨鑽戒指。

二人此行相當神秘，問是否隱瞞公司秘婚？楊怡指公司一直很支持二人交往，謙謙則說：「年頭已經同咗老闆講會結婚，結婚係開心嘅事，收到好多短訊祝福，我哋都唔敢回覆住，想返嚟一次過講，唔想大家有猜測，想喺鏡頭前多謝佢哋。我哋相處都有好幾年，結婚係大家意料中事，都想快啲拉埋天窗。」問新婚的楊怡會否做「跟得夫人」陪謙謙返內地工作？她說：「我嚟緊都會做嘢，仲有啲工作傾談中，有幾部大陸劇都想接，如果有時間都會去探吓班，唔使偷偷摸摸，可以名正言順去探佢。（依家同羅生一齊住？）係呀，大家唔使跟我喇！」

羅氏夫婦返回將軍澳愛巢。	楊怡與羅仲謙貼出婚紗照，再肉麻留言示愛。	放大圖片

返愛巢再貼婚照

訪問尾聲，謙謙終於應媒體要求親吻楊怡額頭，二人在大批媒體「護送」下，登上座駕離開機場，返抵楊怡位於將軍澳的愛巢。婚事曝光後二人終於鬆一口氣，大方分享新婚喜悅。楊怡稍晚更在微博貼出婚紗照，相中有馬車等童話元素，相當浪漫，她Sweet爆表示：「將踏入人生另一階段，謝謝你從此牽着我走，感謝大家對我們的祝福。」而謙謙則大放閃光彈回應說：「羅楊怡！謝謝你的愛。」

文：影視組