Stephy含淚開腔:同小方非童話

被視為「金童玉女」的方力申和鄧麗欣(Stephy)本月17日宣布10年情玩完,繼而再傳出分手死因是Stephy與台灣排球女教練鄧衍敏(小牛)爆出同性緋聞,昨日Stephy終於從台灣返港,首度為她與「小方」和「小牛」的種種是非解畫,Stephy否認「小牛」是第三者,又不覺得與小方的戀情是童話,提到小方她更幾度哽咽落淚,而小方則於三小時前出現機場避走長沙,分手情侶未有碰頭,果然「緣盡」。

鄧麗欣和方力申早前透過經理人公司宣布「分訊」,消息震驚全城。之後小方在活動上獨自面對傳媒講分手因由,說到傷心處還掉下男兒淚,令人動容,女主角Stephy一直避走台灣,並驚爆與同性密友鄧衍敏(小牛)的緋聞,令人懷疑分手與第三者有關。

昨日Stephy終於從台灣返港,半百傳媒在機場守候,Stephy的經理人公司安排四名保安為她護駕。穿黑長褸的Stephy約5時10分步出閘口,並除下黑超企定讓記者拍照,但神情憔悴。

初時不敢看報道

Stephy在現場受訪,她先表示在發「分手聲明」前幾天已和母親離港旅行:「希望搵個地方消化吓同清靜吓,去咗幾日,媽咪先返嚟,我再去咗台灣,除咗放假我都有啲私人嘢要處理。」她坦言宣布後頭幾天不敢看有關報道:「想冷靜吓先再睇,後尾睇晒,亦有睇粉絲留言,知大家好擔心。」期間Stephy一度哽咽,停了10多秒才說下去:「回應件事唔係咁易,決定得好快,要分開,同公布,同要回應,我未有充分時間消化,所以我離開咗10幾日,想冷靜同好好面對大家。希望大家明白感情係兩個人嘅事,咁多年,三言兩語好難解釋分開原因,大家可能覺得我哋係童話,其實我哋同一般情侶一樣,要面對好多問題,當問題累積,好難解釋同解決。」

問小牛是否兩人所指最難解決的問題?Stephy謂:「其實今次去台灣,我要處理嘅其中一樣,就係排球事,大家影到只係我身邊普通女性朋友,大家用正常角度去睇,件事就唔會咁複雜。(怕畀人話同性戀?)完全冇諗,佢係我其中一位女性朋友,大家唔好揣測太多,除咗會傷害我哋兩個(指與小方),亦傷害我身邊朋友。感情係兩個人嘅事,我哋需要時間、空間消化處理。」

同小牛亦師亦友

問與小牛可有發展機會?Stephy重申:「佢只係好好朋友,嚟緊排球好多嘢需要佢指導,我哋亦師亦友。」講到可有機會復合?Stephy沒否定:「將來嘅嘢隨緣,暫時可以做好好朋友,亦希望繼續合作,同保持良好關係。(小方識小牛?)冇正式介紹過,我9月識小牛,小方都知呢件事。(小方相信你同小牛冇嘢?)雖然我同小方冇咩聯絡,我覺得我哋有共識,知道大家都需要空間時間處理同消化。」

至於分手前是否去過「箍煲旅行」?Stephy說:「我哋冇去過旅行。(2月26日喎?)當時唔係咩箍煲,我哋係去台中,有啲私人事搞,去咗兩日。其實我哋嘅問題,要做出呢個決定……」期間Stephy再哽咽。再問分手是否不涉及第三者?Stephy表示聲明已講得好清楚,而誰先提分手,Stephy和小方口徑一致說是一齊決定。Stephy亦稱宣布分手後未有與小方電話聯絡,但有在小方出席活動前傳短訊給他。

差三粒鐘未碰頭

對小方被指借酒澆愁,Stephy謂:「唔信佢會咁,佢身邊有朋友可以傾訴同陪佢,所以好安心。(返港主動聯絡佢?)要搵適當時間,我都要空間抖一抖。」訪問結束後Stephy往停車場期間,兩度停下落淚。

據知小方於三小時前現身機場離境大堂,被問可知Stephy同日返港?小方說知道,問到Stephy和小牛的緋聞及可有聯絡Stephy,小方都沒回應。

文:音樂組

第一手消息請下載on.cc東網iPhone/iPad/Android/