馬浚偉挑戰反派「鬚」妖味
馬浚偉早前在內地接拍著名內地編劇于正的新劇《半妖傾城》，飾演一位魔界妖王的他以長髮配以鬍鬚的搶眼造型示人，霸氣飾演反派，他說：「今次接于正呢個劇，對個人而言算係一大挑戰，因為我參演其中一個單元，飾演黑妖之王係個大反派，但其實內心好有情義，我都好鍾意個角色，所以接受挑戰。」單看造型照，難以認出是馬浚偉本人，他透露花費不少時間化妝：「平均要化兩個半鐘，有時一日可能只拍到一場，化妝時間仲長過拍攝，但絕對係值得！」
冇底線裸露照做
近年一直嘗試改變戲路的馬浚偉，樂意挑戰另類題材的劇本及角色，問到接戲是否冇底線？他坦言：「絕對冇！只要係有內容、有藝術、有心血同有發揮嘅劇本，我都有興趣。（變態同裸露角色？）睇劇情係咪需要，若有需要都可以接受，但唔會刻意祼露，我冇乜特別嘢好睇！哈哈。」談到梅小青與劉家豪回巢TVB，馬浚偉讚兩人很有實力：「想當年與小青姐係同一時間暫別TVB，當時我哋嘅告別作就係佢監製嘅《當旺爸爸》，所以我哋好有緣！（計劃返無綫拍劇？）一切隨緣，只要劇本角色吸引，任何人都可以合作！」文：影視組
