余思敏鬼煮意 氹囡瞞鄭中基
電影《蝙蝠俠對超人：正義曙光》前晚在港舉行首映禮，星光熠熠包括歐錦棠夫婦、黃婉曼等出席，鄭中基（Ronald）與太太余思敏（Sammie）則撇低仔女二人世界，兩人笑言小朋友睇戲時會有很多問題發問，騷擾其他觀眾。提到日前生日時獲老婆驚喜送上親手製蛋糕，Ronald笑言很冧，並讚老婆手藝好：「真係好味，好驚訝！」
為小朋友學廚
Sammie則透露從未整過蛋糕，趁老公工作時偷偷上堂學：「其實佢煮嘢叻過我，平時佢喺廚房見到我攞住刀都話等佢嚟，但師傅都讚我有天分。（籌備咗呢個驚喜幾耐？）幾日！最難係要教識個女守秘密。（嚟緊會煮多啲畀老公食？）都會嘅，佢都開始有啲投訴，同埋都想整嘢食畀小朋友，健康啲，所以會盡力學。」
對於方力申與鄧麗欣分手，跟兩人分屬好友的Ronald表示可惜，坦言知道消息時感愕然：「但都尊重佢哋決定，當新一頁新開始。（有網友去信白宮叫兩人復合？）講真？我都想簽個名，睇吓奧巴馬係咪真係出手。（你都想佢哋復合？）識咁耐次次都見到佢哋一齊，如果有機會復合都好，可能要啲時間。」
