肥媽一咀出事 志偉險父子反面
殿堂級歌手肥媽（Maria Cordero）前晚假紅館舉行尾場告別演唱會《肥媽友誼長存30周年演唱會》，吸引多位圈中好友捧場，包括徐小鳳、狄龍、黃淑儀、王梓軒等人，其外籍老公則擔任鼓手。全晚肥媽邀得多位嘉賓上台表演，包括曾志偉、BIG FOUR、胡楓、黃小琥、陳潔靈，以及跟首場一樣的阮兆祥、羅敏莊等人。
張衞健感謝提攜
其中志偉上台時大放笑彈，對於徐小鳳有捧場，志偉即笑言：「小鳳姐你好得閒？咁嘅騷都睇？」搞到肥媽即刻鬧他：「撞鬼呀你！」抵死的志偉繼續搞gag：「肥媽係唯一一個人令我差啲同個仔脫離父子關係，因為喺《大丈夫》裏面肥媽要同我個仔打茄輪，我同仔講做人就係咁，好一餐，唔好又一餐，如果肥媽你都啃得落，人生有咩啃唔落？所以由嗰日起我個仔長大咗，但好似變咗gay。」全場大笑。之後他們合唱《喜氣洋洋》，在座的原唱者徐小鳳亦有跟住和唱。接着輪到BIG FOUR出場，張衞健表示：「初初以為肥媽啲fans係三高，估唔到都幾有活力。」之後亦正經謂廿多年前他發展不順，全年零收入，許志安介紹肥媽他識，肥媽即簽他表演十場騷，故他很感謝肥媽。
落淚謝家人支持
而全晚肥媽提到家人及朋友支持時多度哽咽落淚：「屋企人對我好好，因為我嘅關係搞到啲孫返學會畀人笑，但佢哋都冇怨過我，永遠喺我隔籬。」期間兩個孫女更上台獻花。騷後肥媽在後台受訪，問到可會舉行part 2演唱會？她謂：「唔好搞咁多嘢，喉都沙埋。（點樣多謝班老友？）買咗禮物，同埋會同佢哋每人食飯，發覺原來有好多朋友咁錫我，令我飄飄然。」騷後肥媽會跟家人旅行，表示五月會到美加，亦記起有次在英國食飯令她大出血：「我哋三十幾四十人，食一餐飯食咗我八萬幾蚊，真係骨罅都赤埋，不過好開心，呢種感覺冇辦法用錢形容。」 文：音樂組
