嘉欣 學友 教女要獨立
分別有兩名女兒的張學友與林嘉欣，教育女兒方法可謂南轅北轍，廿四孝爸爸學友自認對女兒過分溺愛，曾安排大女到英國留學，但私心卻想女兒多留在自己身邊，不諱言女兒長大後便會有自己世界，故要珍惜現在，相反嘉欣僅五歲多的大女相當獨立，每朝自製早餐之餘，還會為嘉欣沖咖啡，令學友流露羨慕之情！
隔14年再合演
張學友和林嘉欣相隔14年再度結片緣，於電影《暗色天堂》中合作，二人的身份已「升呢」父母，同育有兩女的嘉欣和學友笑言在片場掛住傾湊女經，反而好少傾劇情！
嘉欣：14年前同你合作《男人四十》，最近就同你拍《暗色天堂》，真係好有緣分同開心。咁多年之後，我哋嘅身份都唔同咗，但大家又咁啱有兩個囡囡，所以我哋去到片場就多咗個話題，反而好少傾劇情。
學友：可以話係唔傾劇情添，學你話齋，呢套戲從來冇講要點演，所以大家做咗準備開工，演員好睇當時喺現場情況，如果演員係冇辦法發揮到，咪惟有跟住劇本，所以今次同你都好驚喜。
嘉欣：除咗埋位演戲，我哋都會傾吓小朋友嘢。
學友：講吓點樣教小朋友。（你好溺愛兩個女喎！）係啦，我好弊O架，會以小朋友行先，咁多年都冇改變，係畀自己原則，希望佢哋有份參與自己嘅發展，唔希望係由我去安排，我會幫手準備。
嘉欣：都好呀，有個咁細心嘅爸爸做準備，你個大女好似去過英國讀書？
學友：係呀！大家都話間學校好，但究竟適唔適合個女去讀呢？其實我之前都有同佢傾過，話如果去到試一年，一年唔得嘅返嚟，心梗係諗如果佢慣咗，咪由我飛囉，飛多幾次啦，我一早都有打算。
承認過分保護
曾送女兒到英國讀書的學友坦言對女兒過分保護，但女兒長大後總有自己的圈子，學友如何不捨始終都要放手，所以他表示會珍惜現在的日子。相反嘉欣5歲的女兒已懂得自己照顧自己，十分獨立，令學友大為欣賞。
嘉欣：咁內心會唔會想個女留香港多啲？
學友：當然想，做父母一定驚，每次幫佢做選擇同決定，咁究竟個決定係咪啱嘅呢？人因為經歷而成長，如果嗰度唔係令你好pleasant（舒適）嘅地方，個細路仔長大會點呢，我好驚呢啲嘢，所以我好在意佢哋會點。我到依家都會接送囡囡，佢哋好快會大，好快有自己生活，大女再過兩年都考大學，我做完巡迴都兩年啦，佢走咗喇喎，成日諗一定珍惜依家多啲。（過分保護令佢哋冇咁快成長？）會O架，依家問題同以前唔同，以前係過分保護，依家係會盡量去保護佢，如果佢想去冒險係適當嘅。
嘉欣：我大女5歲幾，平時問佢做完功課未，佢話做完我就唔check，想將個責任畀佢，我讀晒書嘛，依家讀書嗰個係佢，佢要自己去做，問佢自律會點？佢會答：「有自由囉！」
學友：咁佢都要明白自律係咩先得O架！
嘉欣：佢知有鬧鐘響，但其實我全程都喺旁邊，佢會自己刷牙洗面，唔使叫嘅，好獨立，自己焗多士、搽牛油，我杯咖啡都係佢沖畀我。
學友：唉！我兩個女梗係唔得啦，依家大個都要照顧自己，唔會依賴我，屋企有helper，佢都要大個，去英國住宿舍，返嚟係唔同咗，但永遠都覺得佢哋係BB，我都盡量提醒自己唔好擺太多期望喺小朋友身上，希望佢哋按自己嘅步驟成長。
盡量避免曝光
踏入娛樂圈，難免會成為被追訪的對象，作為演藝人的子女亦不能幸免，學友和嘉欣坦言不希望自己的身份會影響女兒的成長，因此二人都會向女兒解釋自己的職業，但就直言不想女兒踏入娛樂圈。另外，嘉欣又笑指拍攝時會給導演兼丈夫送驚喜！
嘉欣：見你都好保護兩個囡囡，平日都少畀傳媒影到，我都唔希望人哋去影我兩個女嘅。
學友：盡量啦！自己做緊呢行，唔希望佢哋成長因為我而影響咗，但完全冇影響到就呃你啦！每個時段唔同，細個冇咁在意，大個咗就會問點解要影佢，會覺得係爸爸拍戲、唱歌啫，關佢咩事！我都同佢哋解釋咗，但如果佢哋覺得咁會帶畀佢困擾，我會好唔開心，但冇法，所以都勸佢哋有機會都唔好入呢行。
嘉欣：大女都有問媽咪係做咩工作，我會答佢做演員，但佢唔明係咩一回事，我就用另一方法去解釋，話有需要日日變身嘅，所以佢會覺得我嘅工作係扮鬼扮馬。
嘉欣：今次喺電影《暗色天堂》入面，雖然先生係導演，但都冇咩大壓力，反而係覺得佢作為我最Close 嘅Partner，會想製造多啲驚喜畀佢。
學友：係真係假呀？
嘉欣：係呀，喺現場導演想問場戲會點做？我就會話：「我唔話畀你知！」
學友：喂，我會嘔O架喎！佢有咩反應？
嘉欣：我冇問佢反應喎！哈哈！諗番14年前拍《男》片有啲不受控制，啲戲有就有，冇嘅就會冇。
學友：我14年前同依家都係一樣，堅守我崗位。（但嘉欣依家身份都唔同咗！）係呀，所以會簡單啲。
後記：歌神識搞笑？
張學友一直給小記感覺很認真，不會講笑話的感覺，惟經過今次訪問終於改變想法，話說訪問當天學友與嘉欣行程緊密，專訪一個接一個，但兩人也能於超短時間內交足功課，絕無半點冷場，期間學友更不時發揮搞笑本色，時而自嘲時而揶揄嘉欣，就連拍照時，小記談及攝影師曾負責拍劇照，學友竟搞笑說：「咁呀！試吓我兩個都唔郁，你睇吓影唔影到唔同味道出嚟！」此言一出，令在場人士忍俊不禁。
筆錄：影視組
口述：林嘉欣、張學友
攝影：張福宏
場地：香港萬麗海景酒店
嘉欣化妝： Will Wong
髮型： Hin Wan
服裝： i.t.
學友化妝： Julie Hui
髮型：Herman Law @ ii