何國鉦識變通逆市生意掂
時裝設計師何國鉦每年趁時裝周會到巴黎做預展，有感全球經濟不景氣，他說事前已做好心理準備，但出乎意料之外，生意比上年更好：「我個品牌多客人，因為好多舊客返嚟，今年我刻意調低個價，用平啲嘅料，但又做到靚嘅衫，價錢平咗兩至三成，客人覺得價錢唔太貴，物超所值。」他說自己曾經歷2003年沙士的低潮期，認為懂得變通最實際：「寧願賺少啲，如果啲衫咁貴，啲人唔會買。」
工作後，他還有空在巴黎四處遊覽，並在街頭拍了一輯靚相，在社交網放相後，即惹來不少人讚好，原來他只是利用手機簡單的執相效果，就惹來數百like，令他喜出望外。而下月尾他有新計劃，將首次赴西班牙出席婚紗展，希望做供應商，開拓ready-to-wear婚紗的市場，他說：「以前逐件幫人度身訂造，依家除非熟客先做，我寧願一批做，好多人問我點解呢個市道做，其實有危先有機。」