童年遇溺留陰影文詠珊拍水底戲喊驚
影星文詠珊（JM）、張晉及吳樾昨日出席黃柏高與鄭保瑞監製新片《狂獸》發布會，演大賊的余文樂拍短片談角色，現場宣布電影投資逾1億元人民幣，分別到泰國、香港及內地取景，導演李子俊計劃拍攝八號風球下海底打劫戲，令花名「文怕水」的JM大叫驚驚：「場戲我要救人，希望用特技交代到啦！」她又說：「我細個遇溺，感覺就嚟死，之後我試過學游水，但真係唔得，有心理壓力！」
談到水底戲，張晉亦覺得有難度：「成隊crew落晒水，我諗要接受吓潛水訓練。（你識唔識？）唔夠專業，今次海陸空出齊，其實拍戲好多時都有生命危險。（老婆唔嘈你？）佢鍾意潛水，佢好多嘢叻過我。」談到吳奇隆將結婚，黃柏高直言下周出發赴飲宴，並為賀禮大為頭痛。
