黃翠如獻咀蕭正楠翻醋埕

無綫出動半百小生、花旦包括鄭嘉穎、Grace、蕭正楠、黃翠如、黃宗澤、歐陽震華、田蕊妮等到「香港國際影視展」出席《TVB 2016劇集推介記者會》。

唔見兩周冧爆互望

現場播放新劇片段，嘉穎與Grace宣傳《殭》時在台上已冧爆互望，嘉穎介紹新劇時，女友更冧爆望到實，十分癡纏。Grace表示劇中與謝安琪也喜歡嘉穎，她為了嘉穎而變殭屍，主持取笑說現實中她不用變殭屍兩人也能在一起，令Grace冧爆甜笑回應。他倆一齊受訪時，嘉穎說：「佢去咗加拿大拍嘢，我哋已經兩個星期冇見。（白色情人節點慶祝？）諗下先，都係食下飯。（劇中有咀戲﹖）有一場，好輕微。（係咪同謝安琪咀得激啲？）冇去比較，唔需要比較。」問Grace可會吃醋？她收細聲線說：「唔會嘅。」明顯有醋意。

鄭嘉穎、陳凱琳拍拖甜如蜜，女方冧男友冧到出晒面！	黃翠如在劇中咀黃宗澤出事。	黃宗澤：「你睇套戲幾亂！」

台上問責話唔開心

當播放《幕後玩家》蕭正楠與黃翠如咀戲後，鏡頭一轉變為黃宗澤與翠如錫錫，黃宗澤在台上笑謂：「你睇套戲幾亂！」蕭正楠則扮醋意大發說：「我唔覺得好亂，我好唔開心囉，開頭又話冇呢場戲、又話借位嘅！」還向女友翠如大興問罪之師：「你同記者朋友講下點解你要錫？」翠如笑謂：「返屋企先講啦。」蕭正楠受訪時被問到是否呷醋？他說：「唔好問，點答你。戲裏面佢哋似一對多啲，睇到我好傷心。（有冇睇翠如同黃宗澤拍咀戲？）可能導演使開咗我，驚會出事。」翠如笑說：「佢收咗工，有話畀佢聽。（驚唔驚佢嬲？）唔會，佢扮嘢啫。」昨日是白色情人節，兩人皆要在工作中度過，問蕭正楠送甚麼禮物給翠如？他笑謂：「佢送咗呢場戲畀我，睇下我幾時回番場畀佢囉。」

胡定欣（左）、王君馨有氣勢，睇頭十足。

無綫昨日晒冷，由高層率領數十藝人出席香港國際影視展。

黃宗澤講到蕭正楠呷醋，他說：「佢講笑啫，點會嬲！（同翠如多唔多咀戲？）得嗰場，反而同劉佩玥、龔嘉欣有好多親熱戲，有朋友笑話呢部係咪愛情動作片。」

文：影視組