張家瑩夠勇跳出comfort zone

機會不斷 感激亞視

入行8年，有6年多時間在亞視的她難免百感交集。Grace大學畢業便參選亞姐，成為2007年亞姐冠軍，在外人看來條件優厚的她，把由23歲至今的黃金八年都押在亞視上可能是虛擲青春，但她本人不覺如此。

「其實我從來冇諗過自己會入娛樂圈、會參加選美，我喺外國讀書，無論身材同樣貌，同外國人相比都只係好平庸，我大學係讀數學，打扮得好樸素，整日就係拎住計數機喺手，從來冇人會讚我靚。後來返嚟香港，贏咗亞姐冠軍之後先發現自己嘅優點。我好感恩咁多年，公司畀咗好多機會我，不斷訓練我，幾年間我拍咗好多飲食節目，認識到好多飲食界嘅老行尊，如果唔係咁，我都開唔成自己嘅餐廳，冇昨天嘅我就冇今天嘅我，依家我可以搵到一條路去養活自己，唔使再靠屋企，所以我覺得喺亞視咁多年係冇白過。而且我同公司台前幕後嘅人感情都好好，大家好似一家人，有幾年拍旅遊節目，大家起居飲食都一齊，我見佢哋仲多過見我屋企人，關係好密切，加上近年公司出現好多問題，大家一齊面對，種種經歷都係好難忘，係冇嘢可以代替，覺得自己好似上咗人生一課咁。如果畀我再揀，我都係會選亞姐。」

張家瑩與很多亞視藝員及前高層葉家寶都曾面對不少難關，但各人依然感情深厚。	張家瑩（中）在2007年當選亞姐冠軍後，才懂得發掘自己的優點，	樣靚身材正的張家瑩在亞視有不少工作機會，如主持遊旅和飲食節目。

準備充足　唔再被動

亞洲小姐出身的張家瑩坦言亞視是她的comfort zone，但隨着不斷成長，使她心態上有所改變，認為要更進取向外闖。幸好張家瑩約滿亞視後亦有經理人公司、模特兒公司向她招手，令她更有信心繼續在娛樂圈發展。

張家瑩認為在亞視工作的經驗可以為將來的事業打好基礎。	成長不少的張家瑩認為現在向外闖是最適當的時間。	張家瑩踏入30歲時決定開餐廳，近年生意已上軌道。

「約滿亞視後，我會繼續留喺娛樂圈發展，已經有唔同嘅經理人公司、模特兒公司接觸過我，自己有少少先死而後生嘅感覺，因為對我嚟講亞視係一個comfort zone，係個遮風擋雨嘅地方，今次我要勇敢啲走出去，當係畀自己一個機會作其他發展。亞視畀我嘅條件一直好好，令我好有安全感，但依家我要進取啲，唔可以再咁被動。我今年已經32歲，有人覺得我三字頭先向外闖係太遲，我唔認同，依家反而係最適當嘅時間，幾年前我嘅心態同狀態都仲未準備好，因為機會係留畀有準備嘅人，呢一刻我已經ready。」

三十而立 榮升老闆

踏入30歲是不少人的轉捩點，張家瑩亦不例外。當年的她已在演藝圈發展一段時間，開始為自己定下創業的目標，於是決定開餐廳。雖然她在初期經歷困境，但咬緊牙關後，生意總算上了軌道，並計劃在今年開分店，實行在飲食業大展拳腳！

「我好幸運，除咗演藝事業之外，我年幾前開始創業做生意。30歲係我人生嘅轉捩點，30歲前所有經驗都係為將來而儲備，雖然我當時未知自己將來會點，但我知道我乜都要做乜都要試，到咗30歲，我突然清醒咗，我畀自己一個目標同時間，我嘅未來十年要有自己嘅生意，於是決定開餐廳。一開始並非一帆風順，我嘅餐廳喺2014年開張，一開張就遇上佔中，我作為一個普通市民，完全束手無策，只能堅守，當時得到家人同好多朋友嘅支持，最後比預計遲咗半年翻本，去年中秋終於可以第一次分錢，當時真係感動到喊，之後餐廳一直好成功，生意都上咗軌道，我計劃今年開分店外，仲有朋友叫我返大陸開餐廳。」

後記：樂觀面對困境

要離開一個自己熟悉的地方，邁向未知的未來，Grace其實與不少亞視員工一樣，懷着忐忑不安與戰戰兢兢的心情，但樂觀的她發揮逆向思維，把離開視之為展翅高飛的機會，但願所有亞視員工都能以智慧面對逆境，安然度過。

文：陳嘉敏

攝：吳文聰

場地：牛禪燒肉日本料理、18巷泰國餐廳

化妝：Kitty@嫁妝

Ms.Workshop

髮型：Ian@hair trinity