陳敏之嘆港童壓力大怕生BB
最近接二連三發生學生疑因讀書壓力而輕生，引起社會關注，人妻陳敏之昨日為劇集《親親我好媽》拜神時坦言容易受到不幸新聞影響，情願避開不看，擔心看到學生自殺會害怕生BB，又慨嘆香港讀書壓力太大。
江美儀、黃智賢、陳敏之、米雪、呂慧儀、李君妍等昨日在將軍澳電視城為新劇《親親我好媽》拜神，劇集講述時下親子關係。陳敏之在劇中飾演訓導主任與飾演校工的韋家雄有段情，劇情談到喪偶的陳敏之獨力湊大十多歲兒子，管教嚴厲，講到近期接二連三有不少學生輕生，問到會否影響她生BB？陳敏之說：「我都想生，順其自然，自己避開跳樓、自殺新聞唔睇，自己好容易受影響，唔止生BB會驚，仲會擔心有BB身邊朋友，香港讀書壓力太大，同其他國家好唔同，如果將來有小朋友，都要想辦法令佢心靈、身體健康，讀書叻唔叻好小事，最緊要學做人。」
江美儀朋友變「怪獸家長」
江美儀與黃智賢劇中飾演夫妻，育有一對女兒，江美儀飾演「港媽」對催谷女兒讀書管教極嚴謹，要求女兒限時限刻溫習及做功課。講到近期接連有學生輕生，她說：「依家啲小朋友冇晒私人時間，有朋友個仔8歲因為疲勞過度發燒入院，另一個朋友就因為個仔成績唔好，自己高血壓入院，其實小朋友係白紙，你放鬆、佢就放鬆，朋友話我冇小朋友就講得輕鬆，或者係旁觀者清。」
黃智賢則大讚戲中兩位女兒有演戲天分，拍攝順利，他認為新劇緊貼現今家長情況，觀眾會看得有共鳴，希望新劇可以盡快出街。
文：影視組