陳奕迅賀老婆牛一唔送花送時間
歌神陳奕迅前晚風騷出席首映禮，除扮成龍簽名、舉V外，又當眾示範「吹乒乓」，心情靚爆！今年老婆徐濠縈的生日，他自言連花都沒有送，但卻送了最寶貴的禮物：「送咗時間，時間就係最好嘅禮物！」
陳奕迅（Eason）前晚到尖沙咀出席自己有份配音的動畫電影《功夫熊貓3》首映禮，獲好友郭偉亮（Eric）撐場。心情靚爆的Eason表現風騷，除在簽名板上代缺席的成龍簽上「成龍」二字外，又畫公仔，他解釋：「呢個公仔係成龍個V字手勢！」之後獲大會贈送乒乓球拍，Eason開心得拿起乒乓球說：「我以前去啲古色古香嘅地方，見有啲雕塑有條魚，上面吹住個波！」說畢，他即抬頭「吹乒乓」，非常搞笑。
幫手修理家電
Eason被問到送了甚麼禮物賀太太徐濠縈3月7日生日，他說：「送咗時間，時間就係最好嘅禮物！今年連花都冇，陪佢囉！或者唔應講『陪』，應該講係『相處』！呢排我都多咗時間喺屋企，以前飛完返屋企，好攰，冇乜點理屋企，依家會幫手修理吓啲家電，又會帶狗散步。4月去台北，10月去北京做騷。」
囡囡鍾意音樂
Eason又分享與女兒陳康堤的相處點滴，他說：「佢好鍾意睇戲，久不久就會話想睇邊套戲，佢平時都有睇美劇，都鍾意音樂，佢仲介紹我聽佢哋呢個年代嘅音樂，我呢啲out out哋啦！我呢排先聽番自己年代啲歌！」
文：影視組