雨僑有婚數 三年後嫁得「威」

歌手雨僑昨日與譚嘉儀出席戶外迷你音樂會，雨僑受訪時表示愛研究生態，愛睇海豚、雀仔及到石灘，問到有否推介畀男友羅力威睇？她說：「都想，但嗰啲地方多啲人去安全啲。（驚佢保護唔到你？）係大家都保護唔到大家！」提到日前與威威被拍到重返母校參觀，雨僑大方承認：「我間中學拆咗，如果唔係都想帶佢去睇。（感情穩定有計劃結婚？）結婚除咗講感情，都要講狀態，依家係搏殺中，做咗嘢七年都未做夠十年。（夠十年就結？）係囉！人生一個個階段，做嘢想做夠十年，因為婚後做嘢可能會冇咁搏命。（有共識三年後結婚？）未知。」