黃宗澤爆新歡 惹偵探日夜追查

回復單身多時的黃宗澤（Bosco）終爆新戀情，日前被本報直擊與日籍女模JUN孖住出動行超市煮飯仔，為方便與伊人相聚，還於寓所附近租酒店闢「私竇」過二人世界。不過本報追訪期間，頻頻收到不少爆料指Bosco有新歡，惟新歡背景卻與JUN完全不同，有指是Bosco契妹、師妹，Bosco雖已逐一否認，但還有更離譜的指新歡是兩孩之母，他即以「無稽！」來直斥爆料者。

聞住所守候：有啲驚

守候Bosco寓所期間，本報發現一部長期冚旗的「紅的」，由早至夜全天候停泊附近，內裏還坐着幾名男女。經了解過後，他們主動提及正在等候Bosco，還聲稱自己是私家偵探，但問到為何等他，眾人未有再進一步回答。昨日，Bosco為新劇《幕後玩家》開工，雖比原定時間遲了近一小時才現身，卻一臉春風，甫落車即拔足狂奔閃入店舖拍攝，約大半小時後才主動受訪。對於有私家偵探在寓所守候，Bosco聞言大感愕然：「唔係嘛！真係唔知，我屋企樓下？你講完我有啲驚，今晚返去留意吓。」

JUN原來英文不俗，難怪黃宗澤話溝……就溝通到。	黃宗澤的寓所外有私家偵探坐的士守候！	JUN上載的照片有男人手（箭嘴示），疑似是黃宗澤！

對於新戀情，與日籍女模JUN已認識兩、三年的Bosco仍有保留指「了解中」，又澄清同住一間酒店但非同房：「了解吓啫！拍廣告時識，人哋嚟香港旅行，咁啱我屋企裝修，我喺間酒店度住，佢又問我邊間酒店好，咪介紹畀佢同幫佢Book埋。（住同一間房？）梗係分開房！佢都有畀番（訂房）錢我。」提到拍拖到超市買餸，Bosco又搞笑地埋怨被打擾好事：「你哋都唔畀時間人哋了解，阻住人哋識女仔！佢唔太熟悉娛樂圈，嚇親人哋！（互相有好感？）都話了解中，OK啦！」問到與JUN如何溝通？Bosco一臉得戚說：「講英文囉！（英文好叻？）我都有讀書o架！基本溝通冇問題。（身體語言？）唔使！（帶埋見你媽咪？）媽咪唔喺香港。（視訊通話見家長？）飲個下午茶唔使咁。（JUN對你有意思？）了解吓囉！（人哋有冇男友？）冇呀嘛！（學日文助溝通？）咁係好主意，可以請教吓佢日文！」

黃宗澤被問到新戀情即甜笑，證明與JUN了解得八八九九喇！

黃宗澤與張繼聰埋位前有講有笑，唔通又係講女？

讚重禮貌有別港女

提到兄弟蕭正楠笑稱要「八卦」其新戀情？Bosco笑說：「又冇喎！但佢兩個衰仔（蕭正楠及張繼聰）望住我陰陰嘴笑！」完成外景後，Bosco趕返電視城繼續開工，被追訪時坦承當日是首次與JUN單獨約會，問到會否再約會對方？他說：「睇吓有冇時間！（日女同港女有咩唔同？）佢哋好注重禮貌。」雖然自爆首次單獨約會，但情人節前夕生日的JUN當日上載一張芝士蛋糕照，碟邊有意大利文「buon compleanno（生日快樂）」，最耐人尋味的是出現兩隻各拿紅酒杯碰杯的手，其中一隻明顯是男士的手，疑似是Bosco！

文：影視組