蕭潤邦再開分店All In老婆本
憑生煎包打響名堂的前歌手蕭潤邦（Oscar）不經不覺開設第五間食店，他希望生意擴大至集團式，與空姐女友拍拖多年的他承認將「老婆本」全投放在生意上，為免「老婆」遠走高飛已花六位數購買求婚鑽戒，並希望明年拉埋天窗及置業。
前歌手蕭潤邦（Oscar）近年在飲食界大展拳腳，先後在九龍區開設四間食店，曾飛到上海學包小籠包、生煎包的Oscar被封「生煎包王子」，近月他斥資七位數在北角開上海菜館，貴為老闆的他每日都會巡視業務兼「打躉」，Oscar說：「依家好難請人，好多都冇乜責任心，我就好似社工咁，不停同佢哋溝通。」
計劃明年結婚
Oscar坦言全副身家擺晒落新食店，他說：「都用咗七位數。（老婆本？）算係，希望開第六間食店之前可以結婚。」由於其女友是空姐，Oscar承認與對方甚少見面，但已認定對方是老婆，他說：「我哋有晒共識，一步一步嚟。（求咗婚？）已經準備用六位數買求婚戒，之後就會影婚紗相，希望可以明年結婚。（買咗樓？）未，依家樓價開始跌，睇多一陣先。」
問到有否想過將食店上市？Oscar說：「暫時目標想係香港、九龍、新界同離島都有店舖，或者可以做集團式。」問到會否覺得慶幸離開歌手行業能發展「王國」？Oscar說：「應該話冇唱歌之後搵到適合自己嘅行業，自己算係好彩，生煎包救我一命。」
文：音樂組