黃宗澤嫌o靚妹嘈謝絕父女戀

賀歲劇《警犬巴打》中，黃宗澤（Bosco）與鍾嘉欣再度合作，劇中他因被調職到警犬隊而遇上智商高又寸嘴的獸醫嘉欣，鬥氣冤家鬥出感情。現實中，Bosco坦言喜歡IQ高及獨立的女生：「我鍾意叻啲、識照顧自己嘅女仔，唔使照顧我！我做嘢好忙，唔使理我o架。」談到舊愛胡杏兒去年底結婚，單身一段日子的他卻稱未急於結婚，笑言正努力尋覓另一半，希望遇上「Miss Right」。

Bosco稍後跟黃翠如、劉佩玥（Moon）、張繼聰及蕭正楠（Edwin）演出新劇《幕後玩家》，問到會否期望與拍檔擦出愛火？他笑言翠如已名花有主，Moon則像小妹妹。提到鄭嘉穎與陳凱琳玩「父女戀」，他立即「落閘」說：「呢個Percentage好低，我唔係話Moon唔靚或唔好，只係性格唔啱我，我唔鍾意嘈嘅女仔，佢好多電力、好活潑。」

對鍾嘉欣對到悶

近年頻頻往返內地拍劇的Bosco，事隔半年再返無綫拍劇，面對阿聰、Edwin與洪永城等劇界「小鮮肉」，他認為新人愈多愈添新鮮感：「就算競唔競爭好，十部戲有八部係我，你都唔想再見到我，睇到悶啦！」跟嘉欣從《珠光寶氣》到《警》劇合作無間的Bosco又笑說：「就算我拍嘢，十部八部都對住嘉欣，我死畀你睇啦！（咁難受？）唔係！係悶囉！當然隔一輪再拍又會唔同啲，如果連住七、八部就幾辛苦。」

黃宗澤與劉佩玥於新劇中有感情戲，落定閘話唔會過電。	劉佩玥	黃宗澤與鍾嘉欣拍檔多部劇集，連自己都對到悶。

至於會否怕外界將他與「新一代小生」作比較？身為劇界「老」前輩的Bosco笑說：「我哋年紀差唔多啫！又冇乜好比較嘅，做好自己就得。」講到「視帝」競爭愈趨激烈，向來看淡獎項的他說：「當然有獎係開心，但唔覺得有先係好，從來都冇諗拎視帝，最緊要觀眾睇得開心。」

文：影視組

攝：劉斌

髮型：Kel Fung HH.hair.nail

造型：queenieyu

服裝：Initialfashion

化妝：Miko Wong（Cyrus Lee Team）