索爆冠軍姊妹團

【溫哥華特約記者直擊】鍾嘉欣昨日補擺喜宴，岑麗香（香香）、李亞男、苟芸慧和王君馨四位有共同信仰的好姊妹，組成姊妹團契「Amazing Esther」，五位靚女中除了王君馨，其餘四位清一色是選美冠軍，嫁作人妻的李亞男是2005年《國際華裔小姐》冠軍，香香是2010年《國際中華小姐》冠軍，緋聞多多的苟姑娘是2009年《國際中華小姐》冠軍，至於王君馨（Grace）於2007年的《全美華埠小姐》及港姐僅得亞軍，不過渾身舞蹈細胞的她於2008年在內地舞蹈節目《舞動奇跡》舞出冠軍，四位「冠軍級」姊妹在嘉欣的大喜日子組成索爆「冠軍姊妹團」，齊賀好姊妹出嫁！

摸肚沾旺氣

盛傳大肚的嘉欣將會在「Amazing Esther」中第一個跑出做媽媽，「冠軍姊妹團」四位靚女全程為嘉欣護肚，新娘亦孖住四位好姊妹大玩摸肚，她們順勢在嘉欣身上沾旺氣！她們又親力親為為嘉欣打點一切，不介意做「阿四」，像苟姑娘親自向傳媒派水及麵包，相當有心！而新娘子也疼錫一班好姊妹，連花球都被Grace接到，但Grace似乎因苟姑娘感情未有着落，大方轉贈花球，事後苟姑娘在網上留言感謝Grace：「辛苦了寶貝！我突然變得好搶手！」李亞男則留言：「恭喜Grace！明年等你嫁！」莫非暗示Grace下年有喜事發生？

淚浸四姊妹

接得花球的Grace受訪時大爆嘉欣讀誓詞時爆喊：「佢一有少少眼濕濕，我哋啲姊妹就嚟料，但係開心眼淚。」亞男就笑言婚禮既感人又搞笑：「覺得佢終於可以遇到一個啱嘅、可以照顧佢嘅老公，見嘉欣爸爸拖佢入嚟嘅場，梗流下開心嘅眼淚。佢爸媽耐唔耐眼濕濕，都感覺到佢哋為個女好開心，就好似我自己爸媽咁，我當日結婚都有唔捨得，要let go囉。」香香則表示見到嘉欣眼濕濕，成班女仔都眼濕濕：「真係戥佢好開心，見到佢同老公好夾、好可愛、好sweet呀！佢哋同家人斟茶時特別感動！」文：專案組

苟芸慧不介意「派水」做阿四。（電視圖片）

接得花球的王君馨（右二）為乜O嘴？

王君馨（右）轉贈花球給苟芸慧。

鍾嘉欣昨日與老公Jeremy擺喜宴，四位索爆冠軍姊妹盛裝到賀！