鍾嘉欣讚老公勁承諾生4個

【溫哥華特約記者直擊】無綫花旦鍾嘉欣（Linda）日前承認於去年底已跟前無綫行政主席梁乃鵬姪兒、較她年長十多年任職脊醫的Jeremy結婚，震驚娛樂圈！兩人於香港時間昨日在溫哥華西區高級私人會所The Arbutus Club補辦婚宴，款待一眾親友，大批記者早已守候在Jeremy當地的寓所，身穿中式裙褂的嘉欣千呼萬喚下拖實穿上型仔西裝的老公Jeremy步出，兩人笑容燦爛，此時嘉欣表示要趕赴婚宴會場，未有回答問題，但不忘叫大家不要嚇親老公！而一直有傳嘉欣「雙喜臨門」，只見其裙褂頗為闊身，似有意遮掩發福身形。

其後一對新人會見傳媒，與姊妹李亞男、王君馨、岑麗香及苟芸慧影合照，期間Jeremy跟嘉欣多次深情對望，鼻尖貼鼻尖，有傳媒要求Jeremy錫啖嘉欣，他顯得相當怕醜，只輕吻嘉欣粉頸兩次，其後有記者再要求兩人錫錫，Jeremy只說：「OK！Thank you！Bye bye！」然後轉身走人，怕醜得可愛！

嘉欣的婚紗設計簡約，心口位置只有一些喱士點綴，氣質高雅。	Jeremy只輕吻嘉欣粉頸兩次，表現相當怕醜！	身穿闊身裙褂的嘉欣由老公拖實步出寓所，二人笑容一致。

4日認定對方

嘉欣大方接受訪問，她直言老公是由家姐介紹認識，相識十個多月，兩人火速已認定對方：「我認識Jeremy好得意，佢令我相信呢個世界有整定，我認識佢唔使第四日，唔知點解我已經認定佢係老公，佢都認定我係老婆，我哋係異地戀，見面每次要分開，心情好辛苦，跟住就覺得仲等咩？既然兩個都覺得係啱，點解唔快啲呢？」並指去年九月已想結婚，但因要工作才拖到現在。

問到是否雙喜臨門，嘉欣言語間似怕BB小器：「中國傳統，好多時BB嘅嘢，唔好亂講，有事唔係咁好，我會適當時候公布。」有傳嘉欣婚後將退出幕前，她就承諾不會退出，表示跟無綫仍有合約，老公會多回香港爭取時間見面，更自爆老公想跟她生夠四個BB：「唔可以結咗婚唔見面，將來盡量配合，我唔會退出。至於減產，你哋睇吓就知，我將來想生四個小朋友，係咪好得人驚呢？呢個唔係我講，係我老公講，我會配合嘅！」

「我真係好愛佢」

嘉欣繼續狂讚老公，又讚對方「好勁」，更多次表示「我真係好愛佢」，肉麻爆燈！她又說：「佢平時連同我自拍都唔肯，佢一影相就皺眉，我本來影三個鐘婚紗相，佢都問四十五分鐘得唔得！我老公唔鍾意影相、應酬、唔鍾意嘈，佢今日出嚟個心跳到一分鐘二百下，成個禮拜冇一日瞓到覺！所以我覺得佢肯為我付出，同埋佢好鍾意小朋友，好孝順，所以佢係我Mr.Right！（老公點求婚？）太多細節喇！佢唔會鍾意我講，總之好Sweet，同埋好多燈飾嘅地方，喺溫哥華，佢儀式做足晒，但求得好喜劇，我隻戒指一卡幾，最靚嗰隻。（有冇打算度蜜月？）冇，我結完會留喺度做太太、煮飯執屋，請假到三月底，個假完咗要再睇吓點。」

嘉欣又指今次一腳踢籌備婚宴相當辛苦，很感激朋友幫忙及守秘密：「其實我到今朝11點幾先寫完誓詞，仲係寫得差嗰隻，我想特別啲，但寫極都寫唔到，可能太攰！我係有首歌送畀老公，叫《我結婚了》，我會喺行禮度播，我唔會再唱歌喇！咁攰！」

文：影視組

採：娛樂組