岑日珈踩場鬧病父開檔
歌手岑日珈（Angie）父親日前心肌梗塞暈倒家中急送院，堅持出院返家休養的岑父偷雞落生果檔開工，搞到孝順女Angie怒火中燒踩場鬧爆「唔聽話」，知錯的岑父啞口無言兼承諾盡快入院做心臟手術，軟硬兼施的Angie無奈說：「只希望爸爸身體健康。」
岑日珈（Angie）早前漏夜飛車到醫院急症室探望吸住氧氣、瞓在病床上的父親，由於岑父因心肌梗塞突然在家暈倒一度失去呼吸，嚇到淚流滿面的Angie一度失控攬實父親，接受多個檢查的岑父堅持出院返家，Angie為免父親再病發已經聯絡家庭醫生安排入院做心臟手術，並千叮萬囑父親要留家休息，更落禁令他踏足生果舖開檔。
答應盡快做手術
但日前岑父違反禁令，竟偷偷落舖開工，每日都打電話畀媽咪問父親近況的Angie得悉爸爸「偷走」，二話不說直踩舖頭「捉人」，愛之心切的Angie走到岑父前指手畫腳鬧爆「唔聽話」，令正在榨汁的岑父鴉雀無聲，「嬲嬲豬」的Angie即幫手執貨，見愛女出心又出力，岑父終主動攬實Angie說：「爸爸冇事，唔使擔心，會盡快入院做手術。」
Angie直認遭爸爸氣壞，她說：「老人家永遠都覺得自己冇事，依家心臟出現問題都覺得冇問題，鬧又鬧過、講又講過，佢都唔聽，只希望佢身體健康。」Angie強調盡快同醫生安排手術時間，她說：「唔可以再拖。（叫爸爸退休？）畢竟佢都69歲，一早都叫佢唔好做，自己努力賺錢畀多啲家用。」
文：音樂組