莊思敏暴肥見肚腩眼冤

莊思敏（Jacquelin）、崔碧珈、陳婉衡及岑日珈在新片《PG戀愛指引》中扮演Promotion girls，不只衣着性感，劇情也頗大膽，四女也各有不同犧牲。

被水射凍到震

Jacquelin笑言可以大魚大肉，反而更令她煩惱，她說：「我演一個曾經風光，但因為信錯男人搞到要坐監嘅Promoter，我要增肥二十磅去演，肥到140幾磅，每次着上戲服就好冇自信，我唔鍾意嗰件衫！雖然我可以不停食嘢，盡情大魚大肉，但望到自己個肚腩就唔想見人，但期間仲要出活動，呢次都算為藝術而犧牲！最難忘同阿Bob（林盛斌）上飛鵝山拍外景，我諗得幾度咋，羽絨都搞唔掂，阿Bob凍到流眼水，係全片最甘！」當中她怒摑阿Bob的一幕，為求導演收貨連摑廿多巴，啪啪作響。

陳婉衡也抱怨說：「戲中我冇感情線，我現實咁Dry，諗住拍戲談情，點知冇，好可惜！喺銅鑼灣鬧市拍被龍友用水射嗰場戲，凍到我只識震，算辛苦，但劇組好細心，預備大褸、薑茶，都窩心嘅！反而我為咗套戲服要減10磅，我係為食嘢而生存嘅人，嗰期覺得冇晒人生樂趣。」

岑日珈在片中周旋兩男之間。	身材澎湃的崔碧珈難忘爭仔鬧交戲。	莊思敏狂摑阿Bob的一場搞笑戲，成功打動觀眾。

崔碧珈鬧交喊晒

身材出眾的崔碧珈亦要嗌破喉嚨，她說：「我雖然唔使拍銅鑼灣射水嗰場戲，但我要拍一場同好姊妹因為爭仔而鬧交，鬧到喊晒嘅戲！導演要求我嗌到聲嘶力竭，途人以為我哋真鬧交。我同陸駿光又有床戲，尺度係拍戲以來最大，有NG，但唔係因為尷尬，係導演想試唔啲同甫士。」

至於岑日珈就要周旋於兩男之間，被誤當花心劈腿女，她說：「我演一個大學生，為咗同男友馬志威旅行，就做Promotion girl搵錢。（有床戲？）我都想同佢試吓有床戲！反而我同趙勁皓有親熱戲，尷尬實有，我係咁以笑遮醜。（拍床戲最辛苦？）去銅鑼灣拍街景，好凍天氣下被人射凍水，凍到震晒，第二日我仲作病，要食感冒藥！」

攝：張福宏　

場地：Mini Club（尖沙咀）　

莊思敏服裝：Sinequanone

文：影視組