黃宗澤遇癡情粉絲焗送愛的抱抱

黃宗澤（Bosco）、朱千雪、陸永等齊齊於尖沙咀出席無綫劇《警犬巴打》宣傳活動，與台下粉絲互動時，有內地女遊客獲邀上台後不肯離開，原來是等Bosco「愛的抱抱」，而朱千雪則揀中一名婆婆玩遊戲並助對方贏得金猴，婆婆開心指數爆燈，可謂皆大歡喜！

女友要夠獨立

Bosco直言近日忙於拍攝新劇《幕後玩家》，昨元宵節亦在工作中度過。他透露已與拍戲受傷的王浩信通過電話，得知對方無大礙：「拍戲整傷會有，未試過佢咁嚴重。（最傷嗰次係點？）拍內地劇《黃飛鴻》打戲時成個人橫腰瞓咗喺門檻度唔郁得，我真係喊咗出嚟，後嚟唐佳師傅攞藥酒嚟救我。（搵番個女友幫你搽藥酒？）我成日開工又周圍飛，搵女友的話對方一定要好獨立，都係搵跌打醫師易啲。」他又笑言刻下「年紀大」，開工時不會再像以往般如盲頭烏蠅般亂衝，會量力而為。

黃宗澤不停撩狗狗玩，非常有愛心。	一眾演員與粉絲玩遊戲時手忙腳亂，但非常投入。	朱千雪自認係黐身女，對拍拖隨緣。

陸永被劇中狗演員Brother抽中得金(猴)，他開心表示：「我無抽獎命，今次第一次，不過個個叫我請食飯。」由於早前主持玄學節目，幾位高人都指他開始行運，令他雀躍不已。

千雪自認黐身

至於朱千雪竟不知有元宵節這回事，問到她可會想拍拖？她笑謂：「有咪拍囉，隨緣啦！（黃宗澤啱你？佢要搵獨立型。）佢係Brother，亂啲喎。（要獨立）更加唔得，我好黐身！」

文：影視組