龔嘉欣Dry出血追吳業坤利是

無綫藝員龔嘉欣、陳智燊、劉佩玥、湯洛雯、陳偉琪、徐榮、麥明詩及無綫助理總經理杜之克等，昨日在將軍澳電視城出席《明珠台2.22 TVB數碼頻道新安排記者會》。無綫在2月22日凌晨3時重整旗下數碼頻道，「數碼明珠台」（84台）信號會作出調整，觀眾需重新搜台才可繼續收看節目。

翡翠台高清畫質

而明珠台亦會播放不少新節目包括「歐美劇集」《閃電俠（II）》、《女超人》、《X檔案》；「真人騷/時事資訊節目」《碧咸：足球狂熱》、《福島核劫》及一年一度的「奧斯卡頒獎禮」等。翡翠台（81台）將提升至高清畫質，現有的高清翡翠台（85台）將變成J5財富與知識頻道。

單身的龔嘉欣笑言在剛過去的情人節，Dry到流鼻血：「可能太乾燥，喺屋企練歌練到流鼻血，真係Dry爆情人節。（冇人約？）有人約，但唔想太多緋聞，洗吓底幾年先，唔想影響形象。」

吳業坤	劉佩玥右手手臂有傷痕，她說是拍外景時弄傷。	陳偉琪是活動中穿得較性感的一位。

談到《愛‧回家》將大結局，嘉欣表示收到995集大結局劇本才知道，劇集約三月拍完，大家開工時都感不捨，故不時在廠內拍照留念。

拍劇賺三個廣告

嘉欣續說：「遲啲會去美加登台，登台後會拍一個廣告，呢個劇總共帶挈咗我三個廣告，但同吳業坤就冇得比，但佢死都唔肯派利是畀我，話演員唔使派喎，我實會追殺佢！」

劉佩玥最近忙拍新劇《一屋老友記》及《幕後玩家》，現場見她右手手臂有數條傷痕，對此她說：「拍外景有啲碰撞實有，唔會唔開心，之前生風瘌仲驚，都幾礙眼，所以都聽黃翠如講，即刻去醫院打針，之後有睇中醫，叫我要多休息調理。」問劉佩玥是否因捱夜捱出病？她說：「夜晚工作在所難免，惟有玩少啲，早啲瞓，食得清淡啲。」

而劉佩玥在情人節當天收工後約了陳瀅食飯，問劉佩玥豈不是變成電燈膽？她笑說：「邊個係電燈膽都唔知，可能係佢阻住我哋呢，我同陳瀅見面，猷亨（陳瀅男友）唔喺度，詳情就唔講咁多。」劉佩玥戥兩位好姊妹陳瀅及何雁詩蜜運中感到溫暖及幸福，又大讚她們沒有「重色輕友」。

文：影視組