苟芸慧開P 搞婚姻介紹所

苟芸慧過去幾年雖然沒有另一半，但工作中度過情人節一樣充實，她已定下情人節約一班單身朋友過：「去我餐廳整嘢食，食完個人都甜晒，到時互相介紹，女士今日玩咗先，明日（14日）約埋男仔一齊！點心舖依家做得幾好，計劃開婚姻介紹所，跟住設計埋情侶裝、婚紗，實行一條龍服務。」

「ice queen」收花最多

苟姑娘當年在加拿大求學期間，最難忘是情人節成為收花及朱古力最多的學生，為免浪費，她將朱古力轉贈好友。有否男生成功約會她？她說：「冇啦！嗰時個樣好醜樣、箍牙，唔夠膽笑，同學都叫我ice queen，後來先慢慢放自己出嚟。（心儀對象要求？）希望似朋友，可以講笑，孝順同有愛心。」對於擇偶條件，以往當演員接觸的多是圈中人，染指飲食界後便「放眼世界」，認識了不同界別人士，她會朝住這個方向進發：「男仔唔一定要買好貴嘅嘢，試過男友喺我唔方便日子，好細心幫我買熱飲，成個人都融晒啦！」

苟芸慧話食完甜品點會唔甜？	苟芸慧情人節在自家餐廳開P，會約埋男仔一齊玩。	苟芸慧會在她開設的餐廳開P。

開班授徒由頭執到腳

至於沈卓盈（Jessie）去年7月與拍拖三年的富貴男友分手，她深明不少「女強人」因忙於工作無暇打扮，故希望開班授徒，教不懂打扮的女仔改善髮型、衣着及談吐：「幫佢哋由頭執到落腳，提升佢哋嘅自信兼減少公主病問題，咁自然容易啲結識及吸引異性啦！」明天情人節，Jessie打算約單身好姊妹開主題派對慶祝，盡情狂歡，證明「女人當自強」！她直言自己屬「實際型」女友：「整朱古力、焗蛋糕呢啲我好少做，反而會睇對方平時嘅打扮，或者需要用啲咩，如果送啲冇用嘅嘢就嘥咗。」又說情人節年年有，會期待適合的另一半出現！

沈卓盈未有另一半，要形單隻「飲」！

沈卓盈情人節約單身姊妹開P狂歡，一於「女人當自強」。

文：影視組、專案組

攝影：張福宏、劉斌

場地：點心代表、Gaylord Indian Restaurant

沈卓盈髮型：Ron Ng @ HH hair．nail