楊秀惠拜年見家長 收埋性感
身材高挑的無綫小花楊秀惠穿上旗袍向大家拜年，凸顯完美身段。她透露會返馬來西亞與家人一齊歡度春節，最難忘童年與表兄弟姊妹一齊玩，到處拜年收利是的農曆新年，並分享到另一半家中拜年時要留意的四大要點。
楊秀惠（Vivien）今個農曆新年放大假，會回家鄉馬來西亞陪伴家人。她說：「一大班屋企人一齊過年，拎咗個比較長嘅假期返去同佢哋一齊玩。嗰邊過新年嘅慶祝活動比香港豐富，好多華人生活，所以大家更傳統。新年一定會周圍同親戚朋友拜年，亦會食好多傳統嘅馬拉食物好似『撈生』過節，呢啲全部都係我好鍾意嘅習俗。馬來西亞拜年有樣嘢比較特別，每次都要帶桔，意思係大吉大利，而且一定要帶雙數。最難忘係細個同好多表哥、表姐、表妹、表弟一齊玩，將張床褥打直咁擺傍住幅牆，掟晒啲啤牌上去，玩好多好好笑、自創嘅小朋友遊戲，真係好開心。」
家人冇催婚
Vivien直言從未帶另一半回鄉拜年，但就分享前往伴侶家拜年時的「注意事項」：「返自己屋企拜年一直都係自己一個，冇試過帶男仔返去，屋企人都冇催我嘅。有朋友都有講見對方家長會好緊張，我覺得需要同自己另一半溝通咗先，大概了解對方屋企人鍾意啲乜、有啲咩唔應該講、唔應該做。去對方屋企時一定要帶少少食物、手信，當係祝福，唔好兩手空空咁去。着衫方面都要注意，女士當然唔好着得太性感、啲裙太短，我覺得係基本嘅尊重。言談梗係唔可以太粗魯，做番個正正常常、斯斯文文嘅女仔啦，唔需要話做到特別討好。」
最緊要紅色
Vivien笑言每年過節前都會瘋狂減肥預留quota喪食，今年亦不例外。今次穿上Cecilia Yau計設的旗袍騷完美身材的她大讚手工精美之餘，更考慮着傳統服飾拜年：「件旗袍好靚，手工好精細。其實我每年都有諗應唔應該着旗袍出去拜年，但又驚嚇親人，因為喺馬來西亞大家去拜年都着得比較簡單，最緊要有紅色。」
文：陳丹
攝：李柏儒
場地：Mango Tree@Elements
服裝：Cecilia Yau Couture