林峯谷行個唱新年守齋
今日大年初二，林峯跟各讀者拜年，還即席享用「龍蝦撈起」，寓意猴年撈到「峯」生水起！為了4月底第五度登上紅館、舉行《HEART ATTACK LF LIVE IN HK 林峯演唱會》，林峯今年未有跟女友吳千語出外度歲，早早操肌練定體能，還忍口拒食年糕與煎堆等新年油膩食品：「同屋企人講好咗，我話睇你哋食得喇，唔好逼我食嘢！」
林峯指今次個唱的籌備時間長達四個月，比以往的花多接近3、4倍時間，又預告席上將有驚喜，但只肯講與舞台設計有關，希望跟歌迷近距離接觸。他透露今次個唱一半時間是勁歌熱舞，開四面台的他笑言擔心跳到轉錯方向：「擔心冇咩方向感，唔知轉咗去邊。（驚有蝦碌場面？）冇所謂，我係咁！」
推Job多到數唔到
為了個唱，林峯坦言忍痛推掉多個電影及電視劇劇本，數量之多「計唔到」：「睇過嘅劇本都超過十個！有啲係寄咗過嚟未有機會睇！」所以個唱後，他將瞓身電影工作，又預告今年會有新嘗試：「係幾新鮮嘅嘢，但未講得住！」問到忙裏可會偷閒與女友吳千語拉埋天窗？林峯笑言現時是工作搏殺期：「如果有機會喺工作上作更多唔同嘗試，就梗係要把握！依家呢幾年絕對係工作搏殺期。（有冇計劃過？）呢樣當然有Plan，但唔會攞出嚟Share。」
文：音樂組
攝：劉斌
場地：龍壐
化妝：Raymond Yip
髮型：Pius & Keith Wong @ pi4.com.hk
服裝及鞋履：I.T