張智霖猴年多搞作追B寫劇本
張智霖（Chilam）對於過去一年的事業發展大感滿意，猴年除期望「更上一層樓」外，一向對「產品質素」相當有要求的他，寧捨厚酬暫擱置當導演大計，改將精神轉向學習編劇之上，更不諱言有意成立個人工作室，大展鴻圖。談到生猴B大計，他笑說﹕「我OK嘅，但子女嘅嘢要睇天安排﹗」
男神Chilam日前到主題樂園食盆菜，寓意猴年香港市民豐衣足食！於內地出演真人騷酬勞動輒千萬人民幣的他，新年新開始即再有好消息公布：「嚟緊我會再返內地出演綜藝節目《安全總動員》，唔好講酬勞豐唔豐厚，今次係我入行以嚟第一次同粉絲一齊參加節目。而節目主旨係提高大家各方面的安全意識，我覺得好有意義。另外，今年下半年會有個舞台劇演出計劃，傾得七七八八，算係新嘗試，好值得期待。」
新年前Chilam與太太袁詠儀（靚靚）不停遊飛機河，為內地真人騷《一路上有你2》進行拍攝。二人先後到訪過老撾、西班牙的西維爾及馬德里等地，行程緊密更令Chilam印象難忘：「出發前諗都冇諗過老撾會得7度，喺當地到訪過一間學校，啲同學連厚衫都冇，但就好自律咁上堂同排隊，提醒我要惜福。（計劃帶囝囝魔童去行善？）都會嘞，唔可以身在福中不知福嘛，利用有資源地方嘅物資，去幫助冇資源地方嘅人民。」
暫擱置導演夢
Chilam於工作方面絕對有要求，早前他曾表示稍後會於內地首執導演筒，但如今他卻公開「食言」謂﹕「呢個計劃決定擱置嘞，因為個劇本改過都係唔得，咪遲啲先諗囉。我想做到大家聽到我個名，已經覺得出品係信心保證，等同『產品QC』一樣。（冇咗好多錢？）真係唔得嘛，咁點拍呢？如果你問我新年願望，其實作為演員，我咁多年都冇遇過真真正正嘅好劇本，好想遇到！遇唔到惟有等吓先，或者主動啲，自己學吓寫囉。」據悉，他更有意成立自己的工作室，於電影創作方面爭取自主權，Chilam笑言：「係有咁諗過，不過成熟啲先講啦。」
巡唱戒口減磅
至於靚靚早前明言有意追猴B，Chilam表示：「我OK嘅，家庭同小朋友都要睇天安排，順其自然啦，惟一問題係我覺得香港教育制度扭曲咗，好難認同。（送囝囝魔童去留學？）咁又未咁快住，我已經成日飛唔多時間同佢見面，畀多啲時間佢留喺我身邊先啦。」年中繼續返內地作巡迴演唱的他，更希望能成功「戒口」，全年做到均衡飲食，以保持最佳狀態：「廣州演唱會後覺得自己好肥，手臂粗腰又有肉，就算唔使露，畀自己睇都想順眼啲。」
文：影視組
攝：攝影組
化妝：Hetty Kwong
髮型：Vic Kwan @ ii Hair & Nail
服飾：I.T.
場地：香港迪士尼樂園