母親「摸」運亨通阿刨竹戰陪跑
粵劇名伶龍劍笙（阿刨）在港剛完成一連十六場《紫釵記》全劇，順道留港迎接猴年。阿刨趁初四返溫哥華前，與《紫釵記》拍檔鄭雅琪與李沛妍等一眾新秀食開年飯。幾年沒在港過年的阿刨趁新春佳節，與今年107歲高齡的母親打麻雀，還自爆媽咪是「自摸」天后：「啲錢畀母親贏晒！」
今日是大年初一，阿刨跟一眾戲迷拜年，祝大家身體健康，心想事成！
留港過農曆新年的阿刨趁離港前特別相約好友丘亞葵（Vigo）及有份演出《紫釵記》的兩位花旦鄭雅琪與李沛妍、武生黎耀威與梁煒康等食開年飯，慰勞一眾後輩，席間有講有笑，不時分享演出期間的點滴。
感激用心演出
見到後輩茁壯成長，阿刨嫣然一笑：「呢幾位年輕演員好用心，佢哋本身演出經驗好豐富，只不過我哋多咗排練，溝通多咗！至能演得有咁好效果。」問到怎樣培育下一代發展粵劇？她謙虛說：「我唔敢講培育，自己仍然有好多不足地方，我繼續學習！反而多謝佢哋同我一齊演出，佢哋非常用心演，大家配合得好，每晚都有唔同感動位，我從觀眾反應就知道，見到大家不斷進步，好開心！」至於一眾新秀異口同聲表示從阿刨身上學懂很多東西，特別是演員與觀眾之間的交流，令他們終身受用。
過埋年先返加
談到今個農曆新年留港，阿刨表示過得十分簡單，就是多陪母親打牌：「幾年冇喺香港過年，媽媽叫我留低過埋年先走，好開心！大家多時間相聚，就係陪佢打麻雀，托賴佢好精神，雖然打嘅時間唔長，唔會話打八圈，佢好精靈，牌就搵人摸，佢就指揮打邊隻，107歲喇，好犀利！（邊個贏得多？）佢識自摸，牌又高章，我哋同佢打規定自摸先食得，所以佢贏得多！」
而身為後輩的鄭雅琪、黎耀威與梁煒康在新年期間仍忙不停，黎耀威與梁煒康自編自演新派粵劇《飯冰冰舞會佩夫人》，實行反串扮花旦，氹公公婆婆開心過年。鄭雅琪亦有份參演，三人排練時默契十足，歡笑聲不絕！
文：專案組
攝：吳文聰
場地：富臨飯店