《發哥有Say》：周潤發願做BB花招冧老婆

神級影帝周潤發幽默指數已達神級，每次受訪總能夠交出令人意想不到或會心微笑的答案，功力超班！《東網巨星》全新節目《發哥有Say》來到第五集，發哥再暢談生命中最重要的女人「發嫂」陳薈蓮！

發哥與發嫂結婚近30年一直甜蜜恩愛，出席所有活動均秤不離砣，有發哥的地方必有發嫂，發哥提起發嫂笑晒口滔滔不絕，笑認BB要發嫂照顧，起居飲食都靠晒對方安排，否則就會變成「臭男人」！他又賣口乖讚對方愈來愈青春，身材冇得頂！問到是否記得兩人何時第一次錫錫？發哥即搞Gag扮失憶，笑言每朝瞓醒都認不到發嫂，要由頭追求過，嘩！表面是搞笑，內藏冧女最高心法，「巴打們」認真要學嘢！難怪在鏡頭後的發嫂亦忍不住甜笑！

自爆「偷食」

發哥遇到任何阻滯都從容自若，但兩位網友的五星難題，發哥似乎遇到對手，有網友問他下世會想再娶發嫂還是劉嘉玲，發哥即搞笑避談，笑言下世想轉取向揀男人，又讚泰國最美變性人Poyd靚女！另一位網友更直接問發哥有否試過偷食，嚇得發哥O晒嘴，笑說：「嘩！呢樣嘢點講得出口呀！你唔好問啦……偷嘢食就會嘅。」

周潤發與老婆經常糖黐豆出雙入對。

發哥教路，情人節要送花！

激讚身材

記者：每年情人節會點同發嫂過呢？

發哥：花墟買紮花，寫張卡送畀佢，錫啖咁囉！

記者：記唔記得第一次同發嫂拖手同錫錫係幾時？

發哥：嘩！真係唔記得！我都有啲老人失憶癡呆喇！諗唔番，好似都冇同佢拍過拖咁喎！有時見到佢好似好陌生咁(口架)……「邊位呀？唔識佢喎！」一瞓醒：「嘩！邊位呀？」真係死喇！

記者：覺得發嫂身材好唔好？

發哥：呢樣嘢，依家真係標青到「Dum」一聲啦！做咗運動之後，依家真係容光煥發，青春咗幾十年，後生咗好多。

記者：係咪你感染發嫂做運動？

發哥：唔係！係倒番轉頭，係佢搵個教練訓練我(口架)！佢係我恩人嚟(口架)！

記者：做錯嘢嘅時候會點樣氹番發嫂呢？

發哥：唔講嘢啦！唔講嘢係最大嘅懲罰。

攝影：秦健輝